რაც ნიკა მელიამ გააკეთა, გააკეთა თავისი ნებით - მან ძალიან კარგად იცოდა, ჩვენც მრავალჯერ გავაფრთხილეთ, რა მოჰყვებოდა თუ არ შეასრულებდა საგამოძიებო კომისიის კანონიერ მოთხოვნას, რომ გამოცხადებულიყო კომისიის სხდომაზე, - ამის შესახებ პარლამენტის საგამოძიებო კომისიის წევრმა, თენგიზ შარმანაშვილმა ჟურნალისტებთან განაცხადა.

მისი თქმით, „რა პოლიტიკური მოტივი აქვს ეს მელიას გადასაწყვეტია, მაგრამ უკვე არასერიოზულად გამოიყურება, როდესაც კანონს ასე “ეთამაშება” და ჰგონია, რომ ეს მას პოლიტიკურ ქულებს მატებს”.

„მან ეს შეგნებულად დაარღვია - იცოდა პასუხისმგებლობის თაობაზე და საქმე გადავაგზავნეთ პროკურატურაში. კომისიას ალტერნატივაც კი არ გვაქვს, როდესაც სისხლის სამართლის დანაშაულია, რა თქმა უნდა, პროკურატურაში უნდა გადავაგზავნოთ. ეს ჩვენს კეთილ ნებაზეც აღარ არის დამოკიდებული. მას აღკვეთი ღონისძიებით გირაოს გადახდა შეეფარდა და ძალიან კარგად იცოდა, რა მოჰყვებოდა გირაოს გადაუხდელობას. ეს [შედეგი] მოჰყვება მსოფლიოში ყველგან, სადაც გირაოს მექანიზმი მოქმედებს. თუ არ გადაიხდი გირაოს აშშ-ში, გერმანიაში, საფრანგეთში - ანალოგიური შედეგი დადგება. ის ისევ შეგნებით აკეთებს ამას და უკვე არავის ნებაზე არ არის დამოკიდებული ის, რაც შეიძლება სასამართლომ გადაწყვიტოს. ასრულდება კანონის მოთხოვნა და ეს იქნება.

რა პოლიტიკური მოტივი აქვს, ეს მისი გადასაწყვეტია, მაგრამ უკვე არასერიოზულად გამოიყურება, როდესაც კანონს ასე ეთამაშება და ჰგონია, რომ ეს მას პოლიტიკურ ქულებს მატებს. არაფერს არ მატებს და პასუხსაც კანონის შესაბამისად აგებს”, - განაცხადა შარმანაშვილმა.

ცნობისთვის, “კოალიცია ცვლილებისთვის” ერთ-ერთი ლიდერის, ნიკა მელიას სასამართლო პროცესი დღეს არის ჩანიშნული.

შეგახსენებთ, მელია საქართველოს პარლამენტის დროებითი საგამოძიებო კომისიის სხდომაზე ახსნა-განმარტებისთვის დაიბარეს, სადაც ის არ მივიდა, რის შემდეგაც მას ბრალდება წაუყენეს.

თბილისის საქალაქო სასამართლოს გადაწყვეტილებით მას აღკვეთის აღკვეთის ღონისძიების სახით 50 000-ლარიანი გირაო შეეფარდა, თუმცა მელიამ გირაოს გადახდაზე უარი თქვა.

ნიკა მელიას ბრალდება სისხლის სამართლის კოდექსის 349-ე მუხლით წარედგინა, რაც „საქართველოს პარლამენტის დროებითი საგამოძიებო კომისიის მოთხოვნის შეუსრულებლობას“ გულისხმობს.

ეს ქმედება ისჯება ჯარიმით, ან თავისუფლების აღკვეთით ვადით ერთ წლამდე, თანამდებობის დაკავების, ან საქმიანობის უფლების ჩამორთმევით ვადით სამ წლამდე.