ციხეებში ადამიანს აწამებდნენ, აუპატიურებდნენ, სხვის გაუპატიურებას აყურებინებდნენ, გაუპატიურების იმიტაციას უტარებდნენ, ამას იღებდნენ ფირზე, რომ შემდეგ ეს ვიდეოები გაევრცელებინათ, ძალით აწერინებდნენ აღიარებას არარსებული დანაშაულისა - ეს დადასტურდა დღეს და ამას ეძახის პოლონეთის მთავრობა დემოკრატ და მოდერნიზატორ ხელისუფალს - მიხეილ სააკაშვილს, - ამის შესახებ პარლამენტის თავმჯდომარემ, შალვა პაპუაშვილმა ჟურნალისტებთან განაცხადა.

მისი თქმით, „როდესაც მთავრობა დიქტატორს და მწამებელს უყურებს და ამას ან არ იმჩნევს ან მალავს, ის ან არაკეთილსინდისიერია ამ მხრივ, ან გამოუცდელია და ვერ ამჩნევს რა არის სიმართლე“.

„კითხვაც იყო პოლონეთის საელჩოს განცხადებასთან დაკავშირებით. 2 დღის წინ „ტროიკას“ განცხადება მოვისმინეთ, მათ შორის პოლონეთის პრემიერ-მინისტრის, რომელიც რაღაც საყვედურებს გვითვლიდა დემოკრატიასთან დაკავშირებით.

შეგახსენებთ, რომ პოლონეთის მოქმედი საგარეო საქმეთა მინისტრი მიხეილ სააკაშვილს მოიხსენიებს, როგორც მოდერნიზატორს და დემოკრატს. აი, ამ პოლონეთის სამინისტროს მიერ ნაქები მიხეილ სააკაშვილის სისტემა იყო ასეთი, რაც დღეს უკვე დადასტურებულად მოვისმინეთ სასამართლოს განაჩენით. ციხეებში ადამიანს აწამებდნენ, აუპატიურებდნენ, სხვის გაუპატიურებას აყურებინებდნენ, გაუპატიურების იმიტაციას უტარებდნენ, ამას იღებდნენ ფირზე, რომ შემდეგ ეს ვიდეოები გაევრცელებინათ. ძალით აწერინებდნენ აღიარებას არარსებული დანაშაულისა და ეს დადასტურდა დღეს. ამას ეძახის პოლონეთის მთავრობა დემოკრატ და მოდერნიზატორ ხელისუფალს - მიხეილ სააკაშვილს. ასე რომ, რა თქმა უნდა, როდესაც პოლონეთის მთავრობა და საგარეო საქმეთა სამინისტრო რაღაც კითხვის ნიშნებს აყენებს საქართველოში დღეს არსებული დემოკრატიისა და სამართლებრივი სახელმწიფოს სტანდარტებზე, რა თქმა უნდა, მათი სიტყვის დამაჯერებლობა დაბალია. როდესაც მთავრობა დიქტატორს და მწამებელს უყურებს და ამას ან არ იმჩნევს ან მალავს, ის ან არაკეთილსინდისიერია ამ მხრივ, ან გამოუცდელია და ვერ ამჩნევს რა არის სიმართლე“, - განაცხადა პაპუაშვილმა.

ცნობისთვის, თბილისის საქალაქო სასამართლომ გაიზიარა პროკურატურის მიერ წარდგენილი მტკიცებულებები და პატიმრის წამების ფაქტზე ბრალდებული, სასჯელაღსრულების დეპარტამენტის მე-8 დაწესებულების ყოფილი დირექტორი ალექსანდრე მუხაძე (მეტსახელად „ქილერა“) დამნაშავედ ცნო. აღნიშნულთან დაკავშირებით ინფორმაციას საქართველოს გენერალური პროკურატურა ავრცელებს.

უწყების ცნობით, ალექსანდრე მუხაძეს 9 წლით თავისუფლების აღკვეთა მიესაჯა.