ადვოკატები „თანაინვესტირების ფონდის“ ყოფილი ხელმძღვანელის, გიორგი ბაჩიაშვილის მიერ გაჟღერებულ ინფორმაციაზე გამოძიების დაწყებას მოითხოვენ.

ამ მოთხოვნით ადვოკატები გენერალურ პროკურატურას დღეს, ელექტრონული წესით მიმართავენ.

საქმე ეხება ბაჩიაშვილის განცხადებას, რომ ის „მოიტაცეს“.

როგორც „ინტერპრესნიუსთან“ ბაჩიაშვილის ადვოკატმა დავით ჯანდიერმა განაცხადა, აღნიშნულ საკითხზე მათ გლდანის მე-8 დაწესებულებაში, ბაჩიაშვილთან საბოლოო დეტალები გაიარეს.

„სამუშაო შეხვედრა გვქონდა, საბოლოოდ დავაზუსტეთ განცხადების შინაარსი, რომლითაც პროკურატურას ონლაინ დღესვე მივამართავთ, რაც გამოძიების დაწყების მოთხოვნას უკავშირდება. ფაქტებთან ერთად მოთხოვნა გვექნება, რომ გარკვეული საგამოძიებო მოქმედებები დაუყოვნებლივ ჩატარდეს. მათ შორის, ეს იქნება გარკვეული ტიპის ინფორმაციის გამოთხოვის მოთხოვნა - სარადარო ინფორმაცია, სადისპეჩერო ჩანაწერები, ასევე აეროპორტისა და ბორტის ვიდეოკამერების ჩანაწერები“, - განაცხადა ჯანდიერმა.

ცნობისთვის, სახელმწიფო უსაფრთხოების სამსახურმა 27 მაისს გაავრცელა განცხადება გიორგი ბაჩიაშვილის დაკავებასთან დაკავშირებით. უწყების ცნობით, ბაჩიაშვილი „წითელი ხიდისა და სადახლოს შორის არსებული ე.წ. მწვანე საზღვრის მონაკვეთის მიმდებარედ“ დააკავეს. თავად დაკავებულმა კი სასამართლო პროცესზე განაცხადა, რომ ის საქართველოს წარმომადგენლებმა, ივანიშვილის დავალებით, ბანდიტურ გზას მიმართეს და საქართველოში მოტაცებით ჩამოიყვანეს. ბაჩიაშვილი ამბობს, რომ ის 24 მაისს გაიტაცეს, თვალები აუხვიეს, 2 დღე თვალებახვეული ატარეს და თვითმფრინავში „ჩატენეს“.

„თანაინვესტირების ფონდის“ ყოფილი გენერალური დირექტორი, „ქართული ოცნების“ დამფუძნებლის, ბიძინა ივანიშვილის კრიპტოვალუტის მითვისებაშია მსჯავრდებული და მას 11 წლით თავისუფლების აღკვეთა აქვს მისჯილი. ამასთან, მას ბრალი წარდგენილი აქვს ორ მიმდინარე საქმეზე. კერძოდ, ბაჩიაშვილს ბრალდება წარდგენილი აქვს საქართველოს სისხლის სამართლის კოდექსის 344-ე მუხლის პირველი ნაწილით, რაც სახელმწიფო საზღვრის უკანონოდ გადაკვეთას გულისხმობს და სასჯელის სახით ითვალისწინებს თავისუფლების აღკვეთას ვადით სამიდან ხუთ წლამდე. ასევე,ბაჩიაშვილს ბრალი აქვს წარდგენილი "მტკვარი ჰესის" საქმეზეც საქართველოს სსკ-ის 2201-ე მუხლის მე-2 ნაწილით, რაც სპეციალური უფლებამოსილების მქონე პირის მიერ სამსახურებრივი მოვალეობის შეუსრულებლობას ან არაჯეროვნად შესრულებას გულისხმობს, რამაც მძიმე შედეგი გამოიწვია. წარდგენილი ბრალდება სასჯელის სახედ და ზომად 2-დან 5- წლამდე თავისუფლების აღკვეთას ითვალისწინებს.

აღსანიშნავია, რომ ბაჩიაშვილმა 4 მარტს საქართველოს დატოვების შესახებ განცხადება გააკეთა. მოგვიანებით შინაგან საქმეთა სამინისტრომ განაცხადა, რომ ბაჩიაშვილმა საქართველო 2 მარტს დატოვა. უწყების განცხადებით, მან საქართველო, სასაზღვრო გამტარი პუნქტის გვერდის ავლით, ავტომობილში მოწყობილი სპეციალური სამალავის საშუალებით, სომხეთის მიმართულებით ფარულად გადაკვეთა, სომხეთი კი რუსეთის მოქალაქეობის დამადასტურებელი სხვა პასპორტით დატოვა.