თურქეთის ქალაქ სტამბოლში რუსეთისა და უკრაინის დელეგაციებს შორის მოლაპარაკებების მეორე რაუნდი დასრულდა, - ინფორმაციას რუსული მედია ავრცელებს.

შეხვედრა მოლაპარაკებების მასპინძელი ქვეყნის, თურქეთის საგარეო საქმეთა მინისტრმა, ჰაკან ფიდანმა გახსნა.

„დღეს ამ შეხვედრაზე ჩვენ შევაფასებთ ორივე მხარის პერსპექტივებსა და შეხედულებებს ცეცხლის შეწყვეტასთან დაკავშირებით, ასევე განვიხილავთ ჰუმანიტარული ინიციატივების საკითხებს და ლიდერების შესაძლო შეხვედრისთვის მზადებას“, - განაცხადა ჰაკან ფიდანმა.

უკრაინის დელეგაციას თავდაცვის მინისტრი, რუსტემ უმეროვი ხელმძღვანელობს. დელეგაციის შემადგენლობაში ასევე შედიან უკრაინის პრეზიდენტის ადმინისტრაციის ხელმძღვანელის მრჩეველი ალექსანდრ ბევზი, უკრაინის შეიარაღებული ძალების საზღვაო ძალების სარდლობის შტაბის უფროსის მოადგილე ალექსანდრ დიაკოვი, უკრაინის საგარეო საქმეთა მინისტრის პირველი მოადგილე სერგეი კისლიცა და სხვები.

რუსეთის დელეგაციის შემადგენლობა იგივეა, როგორიც მოლაპარაკებების წინა რაუნდში იყო. დელეგაციას პრეზიდენტის თანაშემწე ვლადიმერ მედინსკი ხელმძღვანელობს, დელეგაციის შემადგენლობაში ასევე შედიან : საგარეო საქმეთა მინისტრის მოადგილე, მიხაილ გალუზინი, რუსეთის შეიარაღებული ძალების გენერალური შტაბის მთავარი სადაზვერვო სამმართველოს ხელმძღვანელი, იგორ კოსტიუკოვი და თავდაცვის მინისტრის მოადგილე, ალექსანდრ ფომინი.