რუსთაველის გამზირზე საპროტესტო აქცია განახლდა.

უწყვეტი პროტესტის 190-ე დღესაც, საკანონმდებლო ორგანოსთან შეკრებილმა მოქალაქეებმა საავტომობილო გზა გადაკეტეს.

დემონსტრანტების მოთხოვნები უცვლელია - დაინიშნოს ახალი არჩევნები და გათავისუფლდნენ აქციების პერიოდში დაკავებული პირები.

პარლამენტთან მიმდინარე აქციას მსვლელობით იმ პატიმრების მშობლები და ოჯახის წევრები შემოუერთდნენ, რომლებიც უწყვეტი აქციების პერიოდში დააკავეს. "თავისუფლება სინდისის პატიმრებს" - მშობლების მარშს ამ შინაარსის ბანერი ჰქონდა გაშლილი მსვლელობის დროს.

პარალელურად, აქცია მიმდინარეობდა საზოგადოებრივი მაუწყებლის შენობასთან, საიდანაც მოქალაქეებმა საპროტესტო მსვლელობით რუსთაველის გამზირისკენ გადმოინაცვლეს და პარლამენტთან მიმდინარე აქციას შეუერთდნენ.