საქართველოს სავაჭრო-სამრეწველო პალატის მხარდაჭერით, თბილისში უზბეკეთის ბიზნეს სექტორის დელეგაცია ჩამოვიდა.

როგორც სავაჭრო-სამრეწველო პალატის მიერ გავრცელებულ ინფორმაციაშია ნათქვამი, ვიზიტის ფარგლებში, გაიმართა 100-მდე უზბეკური კომპანიის გამოფენა, სახელწოდებით „Made in Uzbekistan“.

„ღონისძიება ოფიციალურად 5 ივნისს, „ექსპო ჯორჯიას“ მეოთხე პავილიონში გაიხსნა და 7 ივნისამდე გაგრძელდება. გახსნით ღონისძიებაზე დამსწრე კომპანიებსა და საქართველო-უზბეკეთის ოფიციალურ პირებს მისასალმებელი სიტყვით მიმართეს უზბეკეთის რესპუბლიკის საგანგებო და სრულუფლებიანმა ელჩმა, ბახრომ აშრაფხანოვმა, საქართველოს სავაჭრო-სამრეწველო პალატის პრეზიდენტმა, გიორგი პერტაიამ და უზბეკეთის სავაჭრო-სამრეწველო პალატის თავმჯდომარის მოადგილემ, დილშოდ რასულოვმა.

გამოფენაში მონაწილე უზბეკური კომპანიები წარმოადგენენ ეკონომიკის სხვადასხვა საკვანძო სექტორს, მათ შორის: სოფლის მეურნეობა, ელექტრო აღჭურვილობა, მშენებლობა, საავტომობილო მრეწველობა, ფარმაცია, ავეჯის წარმოება, ქიმიური მრეწველობა, ტექსტილი და სხვ. აღნიშნული კომპანიები, გამოფენის ფარგლებში, წარადგენენ თავიანთ პროდუქციას და ექნებათ მზაობა, დაამყარონ მჭიდრო პარტნიორული ურთიერთობები ქართულ მხარესთან.

სწორედ ორი ქვეყნის ბიზნეს სექტორებს შორის მზარდი ინტერესის საპასუხოდ, სავაჭრო პალატა აქტიურად განაგრძობს ქართული და უზბეკური კომპანიებისთვის დაახლოების შესაძლებლობების მხარდაჭერას. უახლოეს მომავალში პალატა კვლავ გეგმავს არაერთ აქტივობას, რაც ორ ქვეყანას შორის სავაჭრო-ეკონომიკური ურთიერთობების განვითარების წინაპირობა გახდება. ღონისძიებაზე დასწრება უფასოა ნებისმიერი დაინტერესებული კომპანიისთვის“,- ნათქვამია ინფორმაციაში.