„ქართული ოცნება“ გენერალური პროკურორობის კანდიდატის პარლამენტისთვის წარდგენისა და მისი თანამდებობაზე განწესების წესებსა და პროცედურას ცვლის.
უმრავლესობის წევრებმა “პროკურატურის შესახებ“ კანონში ცვლილებების პროექტი მოამზადეს, რომელსაც პარლამენტი დაჩქარებული წესით განიხილავს.
პროექტის თანახმად, საპროკურორო საბჭოში გენერალური პროკურორობის კანდიდატის წარდგენასთან დაკავშირებული პროცესი ერთი კვირის ვადაში დასრულდება.
ამასთან, გენერალური პროკურორობის კანდიდატების შესარჩევად სამოქალაქო საზოგადოების, აკადემიური წრეებისა და სამართლის დარგის სპეციალისტებთან კონსულტაციების საჭირო აღარ იქნება.
გენერალური პროკურორობის კანდიდატის დასახელების უფლება საპროკურორო საბჭოს თითოეულ წევრს ექნება.
შეგახსენებთ, რომ გენერალური პროკურორის თანამდებობა ვაკანტურია. გენპროკურორი გიორგი გაბიტაშვილი პარლამენტის თავმჯდომარემ შალვა პაპუაშვილმა გენერალური აუდიტორის თანამდებობაზე წარადგინა. გაბიტაშვილს ახალ პოსტზე პარლამენტი მიმდინარე კვირას დაამტკიცებს.
