„ქართული ოცნების“ აღმასრულებელი მდივანი და საპარლამენტო უმრავლესობის ლიდერი, მამუკა მდინარაძე აცხადებს, რომ კამპანიური სახე აქვს „ერთიანობა ნაციონალური მოძრაობის“ თავმჯდომარის თინა ბოკუჩავას ინფორმაციას, რომლის თანახმად, მისი მეუღლე, კოტე იოსელიანი გაიტაცეს.

მდინარაძის თქმით, „აღარაფერი დარჩენიათ“ და მსგავს „ამბებს იგონებენ“ . მდინარაძე იმასაც ამბობს, „ცოტა ხანში ერთმანეთისთვის დაზიანებების მიყენებას დაიწყებენ“.

„მოდი ერთ რამეს გთავაზობთ თინა ბოკუჩავას და მის მეუღლეს ვიღაცამ მაგრად აგინოს, საშინელებები მოუგონოს, საზიზღრობები ილაპარაკოს. მერე იგივე ვიღაც გამოვიდეს და ბოდიში მოიხადოს თქვას, რომ ბოდიშის მოხდა მას აიძულეს. აი ასეთ მდაბიო სპეკულაციებთან გვაქვს უკვე საქმე. უკვე აღარაფერი რომ აღარ დარჩენიათ, ასეთ ამბებს იგონებენ, სხვათა შორის, სოციალურ ქსელში რამდენიმე დღის წინ ერთი-ორი ვიდეო გამოჩნდა, სადაც ადამიანები ბოდიშს იხდიდნენ თავისი რაღაც საზიზღრობის გახმოვანების გამო „ქართული ოცნების“ სხვადასხვა წარმომადგენლების მიმართ. მე მგონია, რომ ეს უკვე კამპანიაა, მეტი რომ ვეღარაფერი მოიფიქრეს ამ ბოლო პერიოდში. ახლა ახალი კამპანია დაიწყეს, რაღაც საზიზღრობას იტყვის ადამიანი ორ დღეში გამოვა ბოდიშს მოიხდის და მერე იტყვიან - მაიძულეს, გამიტაცეს და რაღაცები მიქნესო. ახლა ამბობენ, რომ ფიზიკური შეურაცხყოფა და ისე შეურაცხყოფაც არ მიუყენებიათო, ცოტა ხანში დაიწყებენ ერთმანეთისთვის დაზიანებების მიყენებას, მე მგონი. დღეს თემა არ იყო არაფერი სოციალურ ქსელში და მთელი დღეა „კადიროველები“ და რაღაც სისულელეებს ლაპარაკობენ. ანუ, უმარტივესი დასალაგებელია. ერთ დღეს აგინე, მეორე დღეს მოუხადე ბოდიში, მერე ვიღაცის ცოლი, დეიდა ან მამიდა გამოხტება და იტყვის გაიტაცეს და იმიტომ მოიხადა ბოდიში. მარტივია ერთ დღეს ერთი უნდა თქვან, მეორე დღეს მეორე“, - განაცხადა მამუკა მდინარაძემ.