ისრაელი გრეტა თუნბერგისა და სხვა აქტივისტების დეპორტაციას განახორციელებს, - ამის შესახებ განცხადებას ისრაელის საგარეო საქმეთა სამინისტრო ავრცელებს.

„უახლოეს რამდენიმე საათში „სელფის იახტის“ მგზავრების ნაწილი ქვეყანას დატოვებს. ისინი, ვინც დეპორტაციის დოკუმენტებზე ხელმოწერასა და ისრაელის დატოვებაზე უარს განაცხადებენ, დეპორტაციის ნებართვის მიღების მიზნით ისრაელის კანონმდებლობის შესაბამისად, სასამართლო ორგანოს წინაშე წარდგებიან“, - ნათქვამია ისრაელის საგარეო საქმეთა სამინისტროს განცხადებაში.

ისრაელის საგარეო საქმეთა სამინისტროს ცნობით, აქტივისტები ბენ გურიონის აეროპორტში გადაიყვანეს, სადაც მათ მშობლიური ქვეყნების საკონსულოების წარმომადგენლები შეხვდნენ.

შეგახსენებთ, ისრაელის ძალებმა ბრიტანეთის დროშის ქვეშ მცურავი გემი Madleen-ი და მასზე მყოფი 12 ადამიანი გუშინ დააკავეს, როდესაც გემმა ღაზას სექტორის საზღვაო ბლოკადის გარღვევა სცადა. დაკავებულებს შორის შვედი გარემოსდამცველი და აქტივისტი, გრეტა თუნბერგი და ფრანგი ევროპარლამენტარი, რიმა ჰასანიც არიან. გავრცელებული ინფორმაციით, გემი, რომელსაც პროპალესტინური „თავისუფლების ფლოტილიის კოალიცია“ (FFC) მართავს, ღაზაში სიმბოლური დახმარების ჩატანას და იქ არსებული ჰუმანიტარული კრიზისის შესახებ საერთაშორისო ცნობიერების ამაღლებას გეგმავდა.