შსს-ს ჰყავს ხელმძღვანელობა, მინისტრი საკმაოდ კომპეტენტური ფიგურაა იმისთვის, რომ გადაწყვეტილებები მიიღოს - ვიღაც შეიძლება წავიდეს სისტემიდან და ვიღაც დარჩეს, - ამის შესახებ პარლამენტის პირველმა ვიცე-სპიკერმა, გია ვოლსკიმ შსს-ში განხორციელებულ საკადრო ცვლილებებზე საუბრისას განაცხადა.

მისი თქმით, შსს-ში მიღებულ გადაწყვეტილებებზე არც პოლიტსაბჭოს და არც პარლამენტის გადაწყვეტილებები არ მოქმედებს.

„შსს-ს ჰყავს ხელმძღვანელობა, მინისტრი საკმაოდ კომპეტენტური ფიგურაა იმისთვის, რომ გადაწყვეტილებები მიიღოს. ამაზე, რასაკვირველია, არც პოლიტსაბჭოს და არც პარლამენტის გადაწყვეტილებები არ მოქმედებს. თუმცა შეიძლება ლოგიკურად ახსნა. რას ჰქვია წმენდა? ლაპარაკობდნენ, რომ საპატრულო დეპარტამენტია დირექტორი თანამდებობიდან წავიდაო და აღმოჩნდა, რომ თურმე იგი თბილისის პოლიციის სამმართველოს უფროსად არის დანიშნული. ასევე, დაწინაურებულია კუპატაძე. სხვა გადაადგილებები ხდება - ვიღაც შეიძლება წავიდეს სისტემიდან და ვიღაც დარჩეს.

რაც შეეხება კონკრეტულად ხარაზიშვილს, უნდა გავიხსენოთ ვის უპირისპირდებოდა და ვინ უპირისპირდებოდა იმ ქვედანაყოფს, რომელსაც იგი ხელმძღვანელობდა. აქ რევოლუციური პროცესის განვითარების და სახელმწიფოს მმართველობის, კანონიერად არჩეული ხელისუფლების დამხობის აშკარა მცდელობა იყო. თუ ის ამას დაუპირისპირდა თავისი ქვედანაყოფით, იმას არ ნიშნავს, რომ იგი თავისი პირადი მოსაზრებებით მოქმედებდა. ასე რომ საკმაოდ მძიმეა ზოგადად დაპირისპირება. ხედავთ, რა ხდება ლოს ანჯელესში, გერმანიაში, საფრანგეთში - სხვადასხვა ქვეყანაში. როდესაც მომიტინგეები პოლიციას უპირისპირდებიან იქ საკმაოდ არასასურველი ფაქტები ხდება. ეს რეალობაა, მაგრამ სამწუხაროა, რომ საქართველოში ამ ფაქტებს წინ კონსპირაციული გეგმა უძღოდა, რომელიც შეჯახებების გარდაუვალობას განაპირობებდა. კონკრეტულ პიროვნებებს რაც შეეხებოდა, რასაკვირველია არის მინისტრი, სამინისტრო, ხელმძღვანელობა და საკმაოდ დიდი პასუხისმგებლობაა მათზე, რომ თავისით მიიღონ გადაწყვეტილებები”, - განაცხადა ვოლსკიმ.