ჩვენ გვაქვს მოლოდინი იმის შესახებ, რომ აშშ-საქართველოს ურთიერთობები ახალ ფაზაში გადავა - მხოლოდ განცხადებები არავის არაფერში სჭირდება, - ამის შესახებ „ქართული ოცნების" აღმასრულებელმა მდივანმა, მამუკა მდინარაძემ ჟურნალისტებს განუცხადა.
მდინარაძემ ასევე ისაუბრა მთავრობის მიერ აშშ-ში საქართველოს ელჩის თანამდებობაზე თამარ ტალიაშვილის კანდიდატურის წარდგენაზეც და აღნიშნა, რომ ის წარმატებული ელჩი იქნება, რომელსაც ამ სფეროში ბევრი წლის გამოცდილება აქვს.
„მინდა მივულოცო თამარ ტალიაშვილს, პროფესიონალს, რომელსაც აქვს ბევრი წლის გამოცდილება ამ სფეროში. ის არის ადამიანი, რომელიც გულით უდგება თავის საქმეს.
რაც შეეხება საქართველო-აშშ-ის ურთიერთობას, ჩვენ გვაქვს მოლოდინი იმის შესახებ, რომ ურთიერთობები ახალ ფაზაში გადავა და ჩვენ სახვეწარი აღარ გვექნება საქართველოს მოქალაქეებისთვის ვიზები, პირდაპირი ფრენები, თავისუფალი ვაჭრობა და ჩვენ დავრწმუნდებით, რომ მართლა გადაიტვირთა ურთიერთობები. მხოლოდ განცხადებები არავის არაფერში სჭირდება“, - განაცხადა მდინარაძემ.
