დემოკრატია ჩვენს თვალწინ თავდასხმის ქვეშაა, ეს მომენტი, რომლის შიშიც გვქონდა, დადგა, - ამის შესახებ კალიფორნიის გუბერნატორმა, გევინ ნიუსომმა განაცხადა, რომელმაც კალიფორნიის მოსახლეობას სიტყვით მიმართა.

„აღარ არსებობს არანაირი კონტროლი და ბალანსი.კონგრესი არსად არის. სპიკერმა ჯონსონმა სრულად უარი თქვა ამ პასუხისმგებლობაზე“, - აღნიშნა გუბერნატომა.

მან საზოგადოებას მოუწოდა, დაიცვან საკუთარი დემოკრატია, თუმცა გააფრთხილა: „თუ პირველი შესწორებით მინიჭებულ უფლებებს იყენებთ, გთხოვთ, ეს მშვიდობიანად გააკეთოთ“.

შეგახსენებთ, ლოს-ანჯელესში აშშ-ის საიმიგრაციო და საბაჟო აღსრულების სამსახურის (ICE) მიერ ჩატარებული რეიდების წინააღმდეგ საპროტესტო აქციები რამდენიმე დღეა მიმდინარეობს. აქციების მიმდინარეობისას პოლიციასა და მომიტინგეებს შორის შეტაკებები ხდება. სამართალდამცავების ინფორმაციით, შაბათს 27 ადამიანი დააკავეს, კვირას - 40, ორშაბათს - 114, სამშაბათს კი - 197. ქვეყნის პრეზიდენტმა, დონალდ ტრამპმა ლოს-ანჯელესში ეროვნული გვარდიის ათასობით ჯარისკაცისა და საზღვაო ქვეითების განლაგების გადაწყვეტილება მიიღო. კალიფორნიის გუბერნატორმა ეს ნაბიჯი შტატის სუვერენიტეტის დარღვევად შეაფასა.