გორის მუნიციპალიტეტში, სოფელ ერგნეთში, ინციდენტების პრევენციისა და მათზე რეაგირების მექანიზმის ფარგლებში რიგით 125-ე შეხვედრა დასრულდა.

როგორც შეხვედრის დასრულების შემდეგ, სახელმწიფო უსაფრთხოების სამსახურის საინფორმაციო-ანალიტიკური დეპარტამენტის დირექტორის მოადგილემ ირაკლი ანთაძემ აღნიშნა, შეხვედრაზე მთავარი აქცენტი გაკეთდა უკანონო პატიმრობაში მყოფი თანამოქალაქეების უპირობოდ გათავისუფლებაზე.

ამასთან, ანთაძის განცხადებით, მიმდინარეობს მუშაობა, რომ თავისუფალი გადაადგილების კუთხით ამჟამად არსებული რეჟიმი შემსუბუქდეს.

,,დღევანდელ შეხვედრაზე განვიხილეთ წინა შეხვედრიდან დღემდე დაფიქსირებული ყველა მნიშვნელოვანი ინციდენტი, მთავარი აქცენტი გაკეთდა უკანონო პატიმრობაში მყოფი ჩვენი თანამოქალაქეების უპირობოდ გათავისუფლებაზე. როგორც მოგეხსენებათ, დღეის მდგომარეობით, ოკუპირებულ ცხინვალში უკანონო პატიმრობაში იმყოფება ჩვენი 10 თანამოქალაქე, არანაირი კონკრეტული დაპირებები ამ კუთხით გაცემული არ იქნა, მაგრამ არსებობს მოლოდინი, რომ უახლოეს მომავალში, შესაძლოა, მივაღწიოთ ჩვენი რამდენიმე თანამოქალაქის საკუთარ ოჯახში დაბრუნებას.

აბსურდული ე.წ. ბრალდებები, რაც ამ მოქალაქეების მიმართ იქნა წარდგენილი, ყველა არის ძალაში და რამდენიმე მათგანი ელოდება ე.წ. სასამართლო პროცესს, რომელთა შედეგსაც ,,ცხელი ხაზის“ მეშვეობით შევიტყობთ.

ასევე განვიხილეთ საანგარიშო პერიოდში დაფიქსირებული უკანონო ე.წ. ბორდერიზაციის ყველა ფაქტი, აღნიშნულზე შედგა ვრცელი დისკუსია და ცენტრალური ხელისუფლების პოზიცია ამ საკითხთან დაკავშირებით არის ცნობილი, რაც მდგომარეობს იმაში, რომ ვიდრე იქნება უკანონო ე.წ. ბორდერიზაციის თუნდაც ერთი ფაქტი, ეს არის მძიმე ინციდენტი და ამაზე ყოველთვის იქნება ადეკვატური რეაგირება.

გარდა ამისა, ვისაუბრეთ თავისუფალი გადაადგილების კუთხით ამჟამად არსებული შეზღუდვების შესახებ. არ მინდა, ჯერჯერობით, გავაჟღერო დეტალები, მაგრამ მიმდინარეობს მუშაობა, რომ ეს რეჟიმი შემსუბუქდეს და შემდეგ უკვე გაჩნდეს სხვა პოზიტიური პერსპექტივები. ამაზე უკვე ვისაუბრებთ მაშინ, როდესაც გვექნება კონკრეტული შედეგი“, - განაცხადა სუს-ის საინფორმაციო-ანალიტიკური დეპარტამენტის დირექტორის მოადგილემ.

ინფორმაციისთვის, ინციდენტების პრევენციის და მათზე რეაგირების მექანიზმის ფორმატში გამართული წინა შეხვედრიდან დღემდე დაფიქსირდა უკანონო დაკავების 5 და უკანონო ე.წ. ბორდერიზაციის 7 ფაქტი.

სუს-ის ცნობით, ინციდენტების პრევენციისა და მათზე რეაგირების მექანიზმის მომდევნო შეხვედრა 2025 წლის 21 ივლისს გაიმართება.