აშშ-ირანის ბირთვული მოლაპარაკებების მეექვსე რაუნდი კვირას ომანის დედაქალაქ მასკატში გაიმართება. შესაბამის ინფორმაციას ომანის საგარეო საქმეთა სამინისტრო ავრცელებს.

როგორც Reuters წერს, აღნიშნულის შესახებ მას შემდეგ გახდა ცნობილი, რაც აშშ-ის პრეზიდენტმა დონალდ ტრამპმა კიდევ ერთხელ გაიმეორა, რომ თეირანს არ მიეცემა ბირთვული იარაღის ქონის უფლება.

ამასთან, ირანელმა მაღალჩინოსანმა სააგენტო Reuters-ს განუცხადა, რომ ირანი ურანის გამდიდრების უფლებას არ დათმობს. მაღალჩინოსნის განცხადებით, თეირანი ისრაელის შესაძლო დარტყმის შესახებ რეგიონის „მეგობრულმა“ ქვეყანამ გააფრთხილა.

მისი თქმით, დაძაბულობის გაზრდის მიზანს თეირანზე „ზეწოლის მოხდენა წარმოადგენს, რათა მან ბირთვული უფლებების შესახებ პოზიცია შეცვალოს“.

„ჩვენ არ გვინდა დაძაბულობა და ბირთვული საკითხის მოსაგვარებლად უპირატესობას დიპლომატიას ვანიჭებთ, თუმცა ჩვენი შეიარაღებული ძალები სრულ მზადყოფნაში არიან, რომ ნებისმიერ სამხედრო დარტყმას უპასუხონ“, - განაცხადა ირანელმა მაღალჩინოსანმა.

ცნობისთვის, გამოცემა CBS News-მა ინფორმაცია გაავრცელა, რომ ისრაელი ირანში ოპერაციის დასაწყებად მზად არის. მანამდე, აშშ-ის პრეზიდენტის, დონალდ ტრამპის ადმინისტრაციამ, ირანთან დაძაბულობის ზრდის ფონზე, ერაყში მდებარე საელჩოს ნაწილობრივ ევაკუაცია და ახლო აღმოსავლეთის სხვადასხვა ტერიტორიიდან პერსონალის ნაწილის გაყვანა დაიწყო.

აშშ-ის პრეზიდენტის, დონალდ ტრამპის განცხადებით, აშშ-ის პერსონალი ახლო აღმოსავლეთიდან იმიტომ გაჰყავთ, რომ „ეს შესაძლოა სახიფათო ადგილი იყოს“. მისი მტკიცებით, შეერთებული შტატები ირანს ბირთვული იარაღის ქონის უფლებას არ მისცემს.