ურთულესი დღეა, მათე დევიძე არის სრულიად უდანაშაულო, სრულიად დაუმსახურებლად ებრძვის რეჟიმი, რომ თავისი იმიჯი და ძალაუფლება დაამტკიცოს, - ასე აფასებს „გახარია საქართველოსთვის“ ერთ-ერთი ლიდერი, დიმიტრი ცქიტიშვილი 19 ნოემბრის აქციაზე, პოლიციელზე თავდასხმაში ბრალდებული 21 წლის მათე დევიძისთვის თავისუფლების 4 წლითა და 6 თვით აღკვეთას.

როგორც მან ჭავჭავაძის გამზირზე მიმდინარე აქციაზე განაცხადა, ოპოზიციის პასუხი უნდა იყოს შეურიგებლობა.

„ნაძირალების ერთნაირი მასა ებრძვის პატარა ბიჭებს და გოგოებს იმისთვის, რომ თავისი თავი დაიმკვიდროს. უმძიმესი ფაქტია, ქართული ისტორიისთვის და რეალობისთვის, ამ შავ ლაქას დიდი ხანი ვერ ჩამოირეცხავენ ისინიც და სამწუხაროდ, საქართველოც. ეს არის უმძიმესი დანაშაული საზოგადოებისა და ქვეყნის მომავლის წინაშე.

ჩვენი პასუხი უნდა იყოს ის, რომ შეურიგებელი ვიყოთ, არ უნდა დავიღალოთ. ამ მდგომარეობის ნორმალიზება არ უნდა მოხდეს“, - განაცხადა ცქიტიშვილმა.