კავკასიის საერთაშორისო უნივერსიტეტში ბაკალავრიატის, მაგისტრატურისა და დოქტორანტურის სტუდენტთა მე-13 საერთაშორისო სამეცნიერო კონფერენცია გაიმართა

კავკასიის საერთაშორისო უნივერსიტეტში (CIU) ბაკალავრიატის, მაგისტრატურისა და დოქტორანტურის სტუდენტთა მე-13 საერთაშორისო სამეცნიერო კონფერენცია გაიმართა.

სამეცნიერო კონფერენცია უნივერსიტეტის რექტორმა კახაბერ კორძაიამ გახსნა.

როგორც მან განაცხადა, კონფერენციის პოპულარობა ბოლო პერიოდის განმავლობაში მნიშვნელოვნად გაიზარდა და 600 განცხადებიდან მხოლოდ საუკეთესო 200 განაცხადის მიღება მოხდა.

„ძალიან მნიშვნელოვანია, რომ სასწავლო პროგრამის გარდა სტუდენტი ჩართული იყოს სამეცნიერო მოღვაწეობაში და ამ კონფერენციის მეშვეობით ჩვენი უნივერსიტეტი ამას ახერხებს. თავად ის ფაქტი, რომ კონფერენცია მე-13-ედ ტარდება, უკვე მრავლის მთქმელია. თავდაპირველად განაცხადები ცოტა იყო - 20-40 ფარგლებში და ვინც მოდიოდა, ყველას ვიღებდით. ახლა პოპულარობა მოიხვეჭა და 600 განაცხადი იყო შემოსული და მხოლოდ საუკეთესო 200 განაცხადის მიღება მოვახერხეთ. ახალი სექცია გვაქვს ასევე, მეორედ გადავწყვიტეთ, რომ საშუალება მიგვეცა მოსწავლეებისთვის, ძალიან ბევრ სკოლასთან გვაქვს მემორანდუმი გაფორმებული.

უნივერსიტეტისთვის ეს ღონისძიება ზეიმია, სტუდენტებს ვაძლევთ შესაძლებლობას, რომ თავიანთი უნარები გამოამჟღავნონ“, - განაცხადა კახაბერ კორძაიამ.

ასევე, კონფერენციაში მონაწილე პირებს სიტყვით დოქტორანტურის სამსახურის უფროსმა, კონფერენციის საორგანიზაციო კომიტეტის თავმჯდომარემ, ნინო მინდიაშვილმა, ხარისხის უზრუნველყოფის სამსახურის უფროსმა, მარინა გედევანიშვილმა და სამეცნიერო კვლევების დეპარტამენტის უფროსმა, კონფერენციის სამეცნიერო საბჭოს თავმჯდომარემ, სესილი გოგიბერიძემ მიმართეს.

კონფერენციის ფარგლებში 8 სექციამ იმუშავა, რომელიც 16 ქვესექციაში იყო გადანაწილებული. აღნიშნული სექციებია: ბიზნესი და ტექნოლოგიები, მედიცინა, მევენახეობა-მეღვინეობა, ჟურნალისტიკა, ინგლისური ენა და ლიტერატურა, საერთაშორისო ურთიერთობები, სამართალი.

კონფერენციის მუშაობაში ასევე ჩაერთო მომავალ სტუდენტთა სექცია, რომელშიც სხვადასხვა საჯარო და კერძო სკოლის მოსწავლეები იღებენ მონაწილეობას.

„პირადად ჩემთვის კონფერენცია მნიშვნელოვანია, რადგან ამით ვიღრმავებ ცოდნას, ვიძენ გამოცდილებას, ჯერ 2 წელია შემოვაბიჯე ამ უნივერსიტეტში და ვფიქრობ, რომ აღნიშნული კონფერენციებით ბევრს მივაღწევთ ახალგაზრდები“,- განაცხადა CIU-ს სოციალურ და ჰუმანიტარულ მეცნიერებათა ფაკულტეტის სტუდენტმა, ანდრია მანიამ.

კონფერენციის მუშაობაში ჯამში 300-მდე მომხსენებელია ჩართული - როგორც ქართველი, ისე უცხოელი სტუდენტები. ნაშრომები წარმოდგენილია ინგლისურ და ქართულ ენებზე, სტუდენტთა მოხსენებებს კი საბოლოოდ დარგობრივი ექსპერტები და პროფესორები აფასებენ.