ისრაელის თავდაცვის ძალების განცხადებით, ისრაელის საჰაერო ძალები ირანის დედაქალაქ თეირანსა და ქვეყნის სხვა ტერიტორიებზე დარტყმების სერიას ახორციელებს, - ინფორმაციას CNN-ი ავრცელებს.

ტელეკომპანიის ცნობით, მანამდე, ირანის ისლამური რევოლუციის გუშაგთა კორპუსმა განაცხადა, რომ თეირანის თავზე საჰაერო თავდაცვის სისტემები ამოქმედდა.

ამასთან, გამოცემა The Times of Israel-ის ცნობით, ისრაელის თავდაცვის ძალებმა ირანის ცენტრალურ ნაწილში მდებარე არაკისა და ხონდაბის ქალაქების მაცხოვრებლებს უსაფრთხოების მიზნით ევაკუაციისკენ მოუწოდეს. გამოცემა განმარტავს, რომ ხონდაბის გარეუბანში მძიმე წყლის რეაქტორი მდებარეობს.

ისრაელის თავდაცვის ძალების განცხადებაში აღნიშნულია, რომ ისინი ამ ტერიტორიაზე ირანის სამხედრო ინფრასტრუქტურის წინააღმდეგ მოქმედებენ.

მანამდე, ისრაელის თავდაცვის ძალებმა გაავრცელა ინფორმაცია, რომ საჰაერო ძალებმა ირანიდან ისრაელის ტერიტორიისკენ გაშვებული დრონი ჩამოაგდო.

ისრაელის ჩრდილოეთით, ბეით-შეანის რაიონში დრონის გამო საჰაერო განგაშის სირენების ხმა ისმოდა.