ის რეზოლუცია, რაც ევროპარლამენტმა მიიღო, არ არის დაფუძნებული რაიმე სამართლიან ინფორმაციაზე - რაც შეეხება, მზია ამაღლობელს, კონკრეტული დანაშაული ჩადენილია, რაც სამწუხაროა, მაგრამ დანაშაულიც სახეზეა, - ამის შესახებ პარლამენტის პირველმა ვიცე-სპიკერმა, გია ვოლსკიმ ჟურნალისტებთან განაცხადა, რითაც შეაფასა ევროპარლამენტში მიღებული რეზოლუცია - „მედიის თავისუფლება საქართველოში, განსაკუთრებით მზია ამაღლობელის საქმე“.

ვოლსკის შეფასებით, მიღებული რეზოლუცია დაფუძნებულია ისეთ ინფორმაციაზე, რომელსაც მხოლოდ იმ ერთი წყაროდან იღებენ, „რომელიც თავის მიერვე არის შექმნილი - არასამთავრობო ორგანიზაციები და ზოგიერთი პოლიტიკური პარტია, რომელიც პირდაპირ ჩართული არიან პროცესების რადიკალიზაციის სამოქმედო გეგმაში“.

„ეს არის ის სურათი, რაც ჩვენ ვიხილეთ და არამხოლოდ ამ რეზოლუციის მაგალითით. არაერთი ასეთი რეზოლუციაა მიღებული.

რაც შეეხება, მზია ამაღლობელს, კონკრეტული დანაშაული ჩადენილია, რაც სამწუხაროა, მაგრამ დანაშაულიც სახეზეა. ამგვარი დანაშაულისთვის ნებისმიერ დემოკრატიულ საზოგადოებაში საკმაოდ მკაცრი სასჯელია გათვალისწინებული”, - აღნიშნა ვოლსკიმ.

შეგახსენებთ, ევროპარლამენტმა რეზოლუცია სახელწოდებით „მედიის თავისუფლება საქართველოში, განსაკუთრებით მზია ამაღლობელის საქმე“ მიიღო. რეზოლუციას მხარი 324 ევროპარლამენტარმა დაუჭირა, 25 წინააღმდეგ წავიდა, ხოლო 87-მა თავი შეიკავა.