ქართველ ხალხს ბრიტანეთის პოლიტიკური სპექტრის ორპარტიული მხარდაჭერა აქვს. ყველა შეხვედრაზე ხაზი გავუსვი იმ ფაქტს, რომ არსებული პოლიტიკური კრიზისის დაძლევის ერთადერთი გზა არის პოლიტპატიმრების გათავისუფლება და ახალი საპარლამენტო არჩევნების ჩატარება, - ამის შესახებ “ლელო-ძლიერი საქართველოს” ერთ-ერთი ლიდერი ბადრი ჯაფარიძე სოციალურ ქსელში ბრიტანეთში ვიზიტისას გამართული შეხვედრების თაობაზე წერს.

როგორც ჯაფარიძე აღნიშნავს, მას არაერთი მნიშვნელოვანი შეხვედრა ჰქონდა სხვადასხვა დეპუტატთან, რომლებთანაც საქართველოში მიმდინარე მოვლენებზე ისაუბრა.

“ბრიტანეთში ვიზიტის ფარგლებში შეხვედრები მქონდა ლეიბორისტ დეპუტატებთან, ანა ტურლეისთან, ალან გემელთან და ბლერ მაკდუგალთან. მათ მკაფიო მხარდაჭერა გამოხატეს საქართველოს დემოკრატიული განვითარებისადმი. ტურლეიმ გამოთქვა ინიციატივა, ბრიტანეთის პარლამენტში აღდგეს საქართველოს მხარდამჭერი ინტერპარტიული ჯგუფი. მაკდუგალთან შეხვედრაზე ხაზი გავუსვი ლონდონის მნიშვნელოვან როლს "ქართული ოცნების" საერთაშორისო იზოლაციის პროცესში, ხოლო გემელთან საუბარში განსაკუთრებით გამოვკვეთე პოლიტპატიმრების გათავისუფლებისა და ახალი არჩევნების აუცილებლობა.

გარდა ამისა, მნიშვნელოვანი შეხვედრები მქონდა თემთა პალატის კონსერვატორ დეპუტატებთან, მათ შორის საგარეო საქმეთა ჩრდილოვან მინისტრ ვენდი მორტონთან და საქართველო-ბრიტანეთის ინტერპარტიული ჯგუფის თავმჯდომარე, მარკ პრიდჩარდთან.

ასევე ვესაუბრე დეპუტატ პერან მუნს, რომელიც ევროსაბჭოში ბრიტანეთის დელეგაციის წევრია. მან კიდევ ერთხელ დაადასტურა მხარდაჭერა საქართველოს ევროპული ინტეგრაციის პროცესის მიმართ და გამოხატა შეშფოთება დემოკრატიული უკუსვლის ტენდენციაზე.

ქართველ ხალხს ბრიტანეთის პოლიტიკური სპექტრის ორპარტიული მხარდაჭერა აქვს. ყველა შეხვედრაზე ხაზი გავუსვი იმ ფაქტს, რომ არსებული პოლიტიკური კრიზისის დაძლევის ერთადერთი გზა არის პოლიტპატიმრების გათავისუფლება და ახალი საპარლამენტო არჩევნების ჩატარება”, - წერს ბადრი ჯაფარიძე.