საქალაქო სასამართლოს მოსამართლეთა დაწინაურების პროცედურა მარტივდება - მოსამართლის სააპელაციო სასამართლოში დასაწინაურებლად ამჟამად არსებული 5-წლიანი ვადა 3 წლამდე მცირდება. ამას "საერთო სასამართლოების შესახებ" კანონში დაგეგმილი ცვლილებები ითვალისწინებს, რომელიც პარლამენტში უკვე ინიცირებულია.

"საქართველოში მოსამართლის განწესება საკმაოდ რთული პროცედურების შედეგად ხდება. თუ ამგვარი რთული პროცედურების შედეგად შერჩეულმა კეთილსინდისიერმა და კომპეტენტურმა მოსამართლემ საქმეთა სიმრავლის და სტრესული გარემოების მიუხედავად, სათანადოდ გაართვა თავი 3 წლის მანძილზე რაიონული (საქალაქო) სასამართლოს მოსამართლის უფლებამოსილების შესრულებას, მას უნდა ჰქონდეს შესაძლებლობა საქმიანობა სააპელაციო სასამართლოში გააგრძელოს. დაწინაურებისათვის დამატებით რაიმე კრიტერიუმების დაწესება აუცილებელი არ არის, რადგან მოქმედი კანონმდებლობით იუსტიციის უმაღლეს საბჭოს ისედაც ევალება - მისი გადაწყვეტილებები ყველა (მათ შორის - საკადრო) საკითხებზე იყოს დასაბუთებული", - ნათქვამია კანონის პროექტის განმარტებით ბარათში.