თავდაცვის ყოფილი მინისტრის, ირაკლი ოქრუაშვილის ადვოკატის, მამუკა ჭაბაშვილის განცხადებით, ოქრუაშვილს ციხეში ახალი ბრალი წაუყენეს.

როგორც ადვოკატი განმარტავს, მისი საქართველოში არ ყოფნის პერიოდში ოქრუაშვილთან რუსთავის მე-12 პენიტენციურ დაწესებულებაში გამომძიებელი შევიდა და ახალი ბრალი გააცნო.

ჭაბაშვილის თქმით, ბრალი „ბანალურ საქმეზეა" და ის ორი წლის წინ, "სამეზობლოში მომხდარ ფაქტს" უკავშირდება. ადვოკატის ინფორმაციით, საქმის მასალები საზოგადოებრივ ადვოკატს გადაეცა. შესაბამისად, მან დეტალები ზუსტად არ იცის.

"როგორც ვიცი, ეს ბრალი გორში, მის სოფელში მომხდარ ფაქტს უკავშირდება. სამეზობლოს, ყოფით, რაღაც ბანალურ შემთხვევასთანაა დაკავშირებული. ნიშანდობლივი ისაა, რომ ორი წლის წინანდელ ამბავზე ახლა მოინდომეს ბრალის წარდგენა. თუ ვინმე ჩიოდა, ორი წლის წინ იჩივლებდა, ასეთი დამთხვევების არ მჯერა, ეს რაღაცასთანაა დაკავშირებული", - განაცხადა ჭაბაშვილმა.

ამ წუთებში კი, თბილისის საქალაქო სასამართლოში პარლამენტის დროებითი საგამოძიებო კომისიის მოთხოვნის შეუსრულებლობის ფაქტზე ბრალდებულ ირაკლი ოქრუაშვილის სასამართლო პროცესი უნდა გაიმართოს.

სხდომას არ დაესწრება თავად ბრალდებული.