თქვენ გჭირდებათ, რომ თქვენთან ვიყოთ, თორემ ჩვენ ანტისისტემური მუჯლუგუნებით ვიზრდებით, ანუ ჩვენი მხრიდან კომპრომისია, რომ საერთო ფორმატში ყოფნას ვთანხმდებით - შეიგნეთ, შეიფერეთ და სწორ გზას გამოჰყევით, ან არა და გავაგრძელებთ თქვენს გზიდან გადარეცხვას, სანამ ჩვენი გზა ტაძართან არ მიგვიყვანს,- ასე მიმართავს პარტია „ფედერალისტების“ ერთ-ერთი ლიდერი თამარ ჩერგოლეიშვილი, საქართველოს მე-5 პრეზიდენტის, სალომე ზურაბიშვილის მიერ შექმნილ „წინააღმდეგობის პლატფორმაში“ მონაწილე მხარეებს.

აღნიშნულის შესახებ პოლიტიკოსი სოციალურ ქსელში წერს.

თამარ ჩერგოლეიშვილის თქმით, „ზურაბიშვილთან ჯაჯგურს“ რომ პოლიტიკოსები - გიგა ბოკერია და თამარ ჩერგოლეიშვილი პლატფორმის ნაწილი აღარ იყვნენ, შესაძლოა, მაქსიმუმ „წინააღმდეგობის პლატფორმის“ განადგურება მოჰყვეს.

„მეგობრებო, უკვე ძალიან წვალობთ და ეგებ დაგეხმაროთ, ვცდი: რამდენიც არ უნდა ეჯაჯგუროთ სალომე ზურაბიშვილს იმაზე, რომ მე და ბოკერია პლატფორმაზე არ უნდა ვიყოთ, ამით მაქსიმუმ თავები და პლატფორმა გაანადგუროთ - სხვას ვერაფერს მიაღწევთ. თქვენ უფრო გჭირდებით ჩვენ - ბოკერია და მე, ვიდრე ჩვენ - თქვენ.

აქამდე, რომ ამას ვერ მიხვდით, მხოლოდ თქვენს სიჩლუნგეზე და თვით დესტრუქციულობაზე მეტყველებს. მეგობრულად გაფრთხილებთ: ან გონს მოეგეთ და გაიაზრეთ, რომ გაცილებით ძლიერები რომ იყავით, მაშინ ვერ მოგვერიეთ - საქმე გააფუჭეთ უბრალოდ თქვენიც და საერთოც. ახლა ხომ მთლად დანაცრულები ხართ და რა "გაბლატავებთ" და რისი იმედით? - გაუგებარია.

ანტისისტემურ გარემოში გავიფურჩქნე, ეგ ხომ იცით - სპექტრს მთლიანად რომ გირტყამთ, ჯანში მიგვდის. თქვენ გჭირდებათ, რომ თქვენთან ვიყოთ, თორემ ჩვენ ანტისისტემური მუჯლუგუნებით ვიზრდებით, ანუ ჩვენი მხრიდან კომპრომისია, რომ საერთო ფორმატში ყოფნას ვთანხმდებით (სწორად მიგვაჩნია ასეთი ფორმატი და იმიტომ, თორემ თქვენი ხათრი კი არ გვაქვს) და ან შეიგნეთ, შეიფერეთ და სწორ გზას გამოჰყევით, ან არა და გავაგრძელებთ თქვენს გზიდან გადარეცხვას, სანამ ჩვენი გზა ტაძართან არ მიგვიყვანს“, - წერს თამარ ჩერგოლეიშვილი.