თბილისის საქალაქო სასამართლოში „კოალიცია ცვლილებისთვის“ ლიდერის, ნიკა გვარამიას საქმეზე სასამართლო პროცესი მიმდინარეობს. სხდომას ნიკა გვარამია არ ესწრება. პენიტენციური დაწესებულებიდან წარმოდგენილი ოქმის მიხედვით, მან უარი განაცხადა სასამართლო სხდომაში მონაწილეობის მიღებაზე.

მხარეები ახლა დასკვნითი სიტყვით ისარგებლებენ, რის შემდეგაც მოსამართლე ჯვებე ნაჭყებია სათათბიროდ გავა.

დაცვის მხარემ მოსამართლეს მიმართა და განუცხადა, რომ დღევანდელ სასამართლო პროცესზე გადაღებასთან დაკავშირებით ტელევიზიებს განცხადება ჰქონდათ დაწერილი, რაზეც მოსამართლე ჯვებე ნაჭყებიამ განაცხადა, რომ იუსტიციის უმაღლესი საბჭოდან გონივრულ ვადაში აუცილებლად მოხდება კომუნიკაცია.

ცნობისთვის, ნიკა გვარამია საქართველოს პარლამენტის დროებით საგამოძიებო კომისიაზე ახსნა-განმარტების მისაცემად დაიბარეს, სადაც ის არ გამოცხადდა. აღნიშნულთან დაკავშირებით მას ბრალი სისხლის სამართლის კოდექსის 349-ე მუხლით აქვს წარდგენილი, რაც "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას" გულისხმობს, აღნიშნული ისჯება ჯარიმით, ან თავისუფლების აღკვეთით ვადით ერთ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.

ნიკა გვარამიას აღკვეთის ღონისძიების სახით 30 000-ლარიანი გირაო ჰქონდა შეფარდებული, რაც მან კანონით დადგენილ ვადაში არ გადაიხადა. შესაბამისად, მას აღკვეთის ღონისძიების სახით შეფარდებული გირაო პატიმრობით შეეცვალა.