ანტიკორუფციული ბიუროს უფროსი, რაჟდენ კუპრაშვილი და საგარეო საქმეთა მინისტრის პირველი მოადგილე - გიორგი ზურაბაშვილი, საქართველოში აკრედიტებული დიპლომატიური კორპუსისა და საერთაშორისო ორგანიზაციების წარმომადგენლებს შეხვდნენ. ამის შესახებ ინფორმაციას ანტიკორუფციული ბიურო ავრცელებს.

მათივე ცნობით, შეხვედრის მთავარ თემას „გრანტების შესახებ" საქართველოს კანონში შესული ცვლილებები წარმოადგენდა.

„ბიუროს უფროსმა დამსწრე საზოგადოებას კანონის მიზნები და მნიშვნელობა განუმარტა. მან აღნიშნა, რომ კანონი მიზნად ისახავს უცხოეთიდან დაფინანსებული ორგანიზაციების საქმიანობის გამჭვირვალობის უზრუნველყოფას და არა მათ რაიმე ფორმით კონტროლს ან საქმიანობის შეზღუდვას.

შეხვედრაზე ასევე განიხილეს, კანონის აღსრულებასთან დაკავშირებული საკითხები და გამოწვევები. რაჟდენ კუპრაშვილმა განაცხადა, რომ ანტიკორუფციული ბიუროს მიზანია ხელი შეუწყოს კანონის შესახებ ღია დისკუსიასა და სწორი ინფორმაციის გავრცელებას როგორც ადგილობრივ, ისე საერთაშორისო დონეზე.

აღსანიშნავია, რომ ელჩებთან შეხვედრამდე, ანტიკორუფციულმა ბიურომ შეხვედრები გამართა არასამთავრობო ორგანიზაციების, ადვოკატებისა და აკადემიური წრეების წარმომადგენლებთან. სადაც, ასევე განიხილეს „გრანტების შესახებ" საქართველოს კანონი და მისი აღსრულების მექანიზმები”, - ნათქვამია ინფორმაციაში.