ისრაელის პრემიერ-მინისტრის, ბენიამინ ნეთანიაჰუს განცხადებით, ისრაელი და აშშ მჭიდროდ თანამშრომლობენ იმ ქვეყნების პოვნის მიზნით, რომლებიც ღაზას სექტორიდან წასულ პალესტინელებს მიიღებენ, - ინფორმაციას The Times of Israel-ი ავრცელებს.

აშშ-ისა და ისრაელის ოფიციალურ პირებს შორის თეთრ სახლში გამართული შეხვედრის წინ ჟურნალისტებმა აშშ-ის პრეზიდენტ დონალდ ტრამპს ჰკითხეს, კვლავ განიხილება თუ არა მისი გეგმა ღაზას სექტორის აღებისა და მისი მოსახლეობის გადასახლების შესახებ.

დონალდ ტრამპმა კითხვაზე პასუხის გაცემა ბენიამინ ნეთანიაჰუს სთხოვა.

„ვფიქრობ, პრეზიდენტ ტრამპს ბრწყინვალე ხედვა ჰქონდა. ამას თავისუფალი არჩევანი ჰქვია. თუ ადამიანებს დარჩენა სურთ, შეუძლიათ დარჩენა, მაგრამ თუ წასვლა სურთ, მათ წასვლა უნდა შეეძლოთ. ღაზა არ უნდა იყოს ციხე. ის ღია ადგილი უნდა იყოს. ძალიან მჭიდროდ ვთანამშრომლობთ შეერთებულ შტატებთან, რათა ვიპოვოთ ქვეყნები, რომლებიც პალესტინელებს უკეთეს მომავალს მისცემენ“, - აღნიშნა ნეთანიაჰუმ.

ამასთან, დონალდ ტრამპმა განაცხადა, რომ აღნიშნულ საკითხთან დაკავშირებით მას მეზობელ ქვეყნებთან შესანიშნავი თანამშრომლობა აქვს. „რაღაც კარგი მოხდება“, - დასძინა აშშ-ის პრეზიდენტმა.