ჩვენს სამ თანამებრძოლს (ლელოს ლიდერებს) მოუწყვეს ჩასაფრება და გადაიყვანეს ნარკოლოგიურში, - ამის შესახებ „ლელო-ძლიერი საქართველოს“ გენერალური მდივანი, ირაკლი კუპრაძე „ფეისბუქზე“ წერს.

მისი ინფორმაციით, ნარკოლოგიურში გადაიყვანეს გენერალური მდივნის მოადგილე, ოთო ფარულავა; კოალიციის კომუნიკაციების ხელმძღვანელი, ლევან ჯორბენაძე და ახალგაზრდული ორგანიზაციის ლიდერი, ბექა ბერიძიშვილი.

კუპრაძე დასძენს, რომ შემთხვევა მოხდა „ერთდროულად ქალაქის სხვადასხვა ადგილას, სახლებთან, დიდ დიღომში, საბურთალოზე და ჩუღურეთში”.

„ვცდილობთ, ვიპოვოთ და გავიდეთ კავშირზე. ბექა ჯერ სახლთან ჰყავთ გაჩერებული, ადვოკატები და თანაგუნდელები გზაში არიან”, - წერს კუპრაძე.

მანამდე, სოციალურ ქსელში გავრცელდა ინფორმაცია, რომ ნარკოშემოწმებაზე გადაჰყავთ აქტივისტი ბექა პაპაშვილიც.