თუ არ არის არჩევნები და მიგაჩნია, რომ პროცესი არის ფარსი, მაშინ არც ბოიკოტია შინაარსით ბოიკოტი, - ამის შესახებ “ევროპული საქართველოს” ერთ-ერთმა ლიდერმა გიგი წერეთელმა “პალიტრანიუსის” გადაცემა “360 გრადუსში” განაცხადა.

მისი თქმით, საჭიროა, პოლიტიკოსებმა საზოგადოებას გეგმა დაანახონ, თუ როგორ უნდა მოხდეს “ქართული ოცნების” იძულება, რომ კომპრომისზე წავიდეს.

“სალომე ზურაბიშვილმა ძალიან მკაფიოდ თქვა, რომ ეს [ოქტომბრის თვითმმართველობის არჩევნები] არ არის არჩევნები. ლოგიკას თუ გავყვებით და მე ასე ვხედავ ამას, ამ პირობებში, თუ კი არაფერი არ იცვლება, აზრი არ აქვს, რადგან ეს არ იქნება არჩევნები იმ პარამეტრებით, იმ სტანდარტით, რომელიც არა მხოლოდ ევროპაში, არამედ ნებისმიერ სახელმწიფოში უნდა იყოს.

როდესაც სასამართლო არ არსებობს, ადმინისტრაცია არ არის, რაც უნდა, იმას გამოგიცხადებენ, მერე რეპრესიებს მოგიწყობენ, ეს რანაირი საფუძველია არჩევნების. ამიტომ, თუ არ არის არჩევნები და მიგაჩნია, რომ პროცესი არის რაღაც ფარსი, მაშინ არც ბოიკოტია შინაარსით ბოიკოტი. ამიტომ, მე ვფიქრობ, რომ მან (სალომე ზურაბიშვილმა) სწორედ ამ კუთხით თქვა, რომ არც ბოიკოტია რეალობა დღეს, იმიტომ, რომ არჩევნები არ არის რეალური და ეს არჩევნები არ იქნება.

საზოგადოებას უნდა დავანახოთ და, მე ვფიქრობ, ამ რვა პოლიტიკური პარტიისა და ბევრი საზოგადოებრივი ჯგუფის კამპანიაც ამ ფორმით უნდა ჩამოვაყალიბოთ, თუ როგორ უნდა მივიდეთ ახალ არჩევნებამდე, როგორ უნდა მოხდეს საზოგადოების კონსოლიდაცია და როგორ უნდა აიძულოს ხალხმა “ქართული ოცნება”, რომ კომპრომისზე წავიდეს და მიიღოს გადაწყვეტილება”, - განაცხადა გიგი წერეთელმა.

ოპოზიციონერმა პოლიტიკოსმა კოლეგებს, რომლებიც თვითმმართველობის არჩევნებში მონაწილეობის მიღებას აპირებენ, პოზიციების გადახედვისკენ მოუწოდა.

“მე მინდა, ჩემს მეგობრებს, ოპოზიციურ ლიდერებს ვურჩიო, რომ გადახედონ თავიანთ პოზიციებს. პოლიტიკაში პოზიციების ცვლილება სირცხვილი ნამდვილად არ არის. თუ არ შეიცვლიან, ეს, ბუნებრივია, მათი გადაწყვეტილება იქნება, მე ერთი რამ მინდა ვთქვა, რომ დაცული იმისგან ვერ იქნებიან, რომ არ იქნება კრიტიკა და არ იქნება ძალიან მწვავე შეფასებებიც”, - განაცხადა გიგი წერეთელმა.