თბილისის მერის მოადგილის, გიორგი ტყემალაძის განცხადებით, თბილისის მერია ახალი მაღალი ევროპული სტანდარტის მეტროს ვაგონის შესყიდვაზე გადავიდა, შესაბამისად, თბილისი 5 წლის განმავლობაში 111 ახალ ვაგონს შეისყიდის.

როგორც ტყემალაძემ განმარტა, ახალი ვაგონების შესყიდვა აზიის განვითარების ფონდთან თანამშრომლობით ხდება.

მისი განმარტებით, ტენდერი აბსოლუტურად ყველა პროცედურის დაცვით ჩატარდა, ხოლო კომპანია „ჯი-თი გრუპი“, რომლმაც ტენდერში გაიმარჯვა, მაღალი სანდოობით და ხარისხით სარგებლობს.

„საზოგადოებრივი ტრანსპორტის განვითარება არის ჩვენი სატრანსპორტო პოლიტიკის ერთ-ერთი მთავარი პრიორიტეტი და დღევანდელი დღეს არის ძალიან მნიშვნელოვანი კომპონენტი ჩვენი ქალაქისთვის იმ სერვისის განვითარების, როგორიც არის საზოგადოებრივი ტრანსპორტი, კონკრეტულად მეტროპოლიტენისა განვითარება. ჩვენ ამ წლების განმავლობაში ვახორციელებთ მეტროს მოდერნიზებას, მეტროსადგურების რეაბილიტაცია ხდება და ასევე მოხდა მეტროს ვაგონების შეკეთება-რეაბილიტაცია ამ წლების განმავლობაში. თუმცა, დადგა ახალი ეტაპი და ეს არის ძალიან მნიშვნელოვანი, რომ ჩვენ გადავედით ახალი მაღალი ევროპული სტანდარტის მეტროს ვაგონების შესყიდვაზე და აზიის განვითარების ფონდთან თანამშრომლობით დღეს ეს უკვე შესაძლებელია - 111 ვაგონი 5 წლის განმავლობაში მოგვეწოდება. ეს არის ჩვენი თანამოქალაქეებისთვის ძალიან მნიშვნელოვანი გადაწყვეტილება. ისინი მომავალში ისარგებლებენ კიდევ უფრო უსაფრთხოდ და კომფორტულად ჩვენი საზოგადოებრივი ტრანსპორტით“, -განაცხადა ტყემალაძემ და აღნიშნა, რომ „კიდევ ერთხელ მინდა მივულოცო ჩვენ თანამოქალაქეების, რომ უახლოეს მომავალში ჩვენი მეტრო იქნება უფრო მეტად კომფორტული და კიდევ უფრო მეტ მგზავრს გადაიყვანს“.