ჩვენ ახლავე უნდა ვიმოქმედოთ და მოვამზადოთ სანქციები იმ ადამიანების წინააღმდეგ, რომლებმაც ოპოზიციონერი პოლიტიკური ლიდერების დაკავებაში მონაწილეობა მიიღეს, - ამის შესახებ ლიეტუვის საგარეო საქმეთა მინისტრმა, კიასტუტის ბუდრისმა ევროკავშირის საგარეო საქმეთა საბჭოს შეხვედრამდე ბრიუსელში ჟურნალისტებს განუცხადა.

მისივე თქმით, საქართველოში სიტუაცია უარესდება.

„ვხედავთ, რომ საქართველოში სიტუაცია კიდევ უფრო უარესდება და ჩვენი მხრიდან ქმედებების ნაკლებობა სიტუაციას დამატებით სტიმულს მატებს. სწორედ ამიტომ, ჩვენ ახლავე უნდა ვიმოქმედოთ და მოვამზადოთ სანქციები იმ ადამიანების წინააღმდეგ, რომლებმაც ოპოზიციონერი პოლიტიკური ლიდერების დაკავებაში მონაწილეობა მიიღეს. ვხედავთ იმ სისხლის სამართლის საქმეებს, რომლებიც მათ წინააღმდეგ აღიძრა და ეს სრულიად მიუღებელია. ჩვენი მხრიდან ამას სანქციებით, რეჟიმზე ზეწოლითა და პოლიტიკური იზოლაციით უნდა ვუპასუხოთ“, - განაცხადა კიასტუტის ბუდრისმა.

ასევე, მისი თქმით, საქართველოში არსებულ ვითარებას ევროკავშირმა სამოქალაქო საზოგადოების მიმართ მხარდაჭერის გაზრდით უნდა უპასუხოს.

„კვლავ ვხედავთ, რომ საქართველოს მოსახლეობის აბსოლუტურ უმრავლესობას ევროკავშირში გაწევრიანება სურს. ჩემს საზოგადოებაშიც ვხედავ, რომ ლიეტუვის მოსახლეობის 60%-ზე მეტს სურს, საქართველო ევროკავშირის ნაწილი იყოს. ვალდებულებები ორივე მხარისთვის არსებობს. არსებობს ვალდებულებები საქართველოსთვის, რომ ადამიანის უფლებების სტანდარტები დაიცვას და არსებობს ვალდებულება ევროპული ქვეყნებისთვის, რომ საქართველოს მხარი მაქსიმალურად დაუჭირონ. მოქმედება ასე უნდა გავაგრძელოთ“, - აღნიშნა ლიეტუვის საგარეო საქმეთა მინისტრმა.