რუსეთის როსტოვის ოლქში, კამენოლომნის სადგურზე უპილოტო საფრენი აპარატის ნამსხვრევების ჩამოვარდის შედეგად გაჩენილმა ხანძარმა მატარებლებლების მოძრაობის განრიგის დარღვევა გამოიწვია, - ინფორმაციას რუსული მედია ჩრდილოეთ კავკასიის რკინიგზაზე დაყრდნობით ავრცელებს.

„როსტოვის ოლქში, კამენოლომნის სადგურზე ინფრასტრუქტურულ ობიექტზე უპილოტო საფრენი აპარატის ნამსხვრევების ჩამოვარდნის შედეგად ხანძარი გაჩნდა. ხანძრის ჩასაქრობად სახანძრო ეკიპაჟი გამოიყენეს“, - აცხადებენ უწყებაში.

მათივე ინფორმაციით, საგანგებო სიტუაციის გამო, 26 სამგზავრო მატარებლის მოძრაობა შეფერხდა.

ჩრდილოეთ კავკასიის რკინიგზაში აცხადებენ, რომ საგანგებო სიტუაციებზე რეაგირების სამუშაოებს კოორდინაციას ოპერატიული შტაბი უწევს.