240 ორგანიზაციას ვსწავლობთ - ვამოწმებთ სახელფასო ფონდებსაც, შემოსავლებსაც, გასავლებსაც, შესყიდვებსაც - თუ შევნიშნავთ დარღვევას, აუცილებლად მივიღებთ შესაბამის გადაწყვეტილებას, - ამის შესახებ ანტიკორუფციული ბიუროს ხელმძღვანელმა, რაჟდენ კუპრაშვილმა ჟურნალისტებთან განაცხადა.

მისივე თქმით, შესწავლის შედეგები საზოგადოებას აუცილებლად ეცნობება.

„ვსწავლობთ ორგანიზაციებს. შედეგები საზოგადოებას აუცილებლად ექნება. ზოგადად, არ უხდება წინსწრებით მიმდინარე საქმის წარმოებას რამე სახით პროგნოზების გაკეთება, რომ არ მოხდეს საქმის წარმოების დაზიანება. ვიცი, რომ მანდედან გკარნახობენ და სწყურიათ, რომ წინასწარ იცოდნენ, რას ვაპირებთ, მაგრამ ჩვენ ვაპირებთ კანონის აღსრულებას. რა თქმა უნდა, ჩვენ ვამოწმებთ სახელფასო ფონდებსაც, შემოსავლებსაც, გასავლებსაც, შესყიდვებსაც. თუ შევნიშნავთ დარღვევას, აუცილებლად მივიღებთ შესაბამის გადაწყვეტილებას," - განაცხადა კუპრაშვილმა.