„ნაციონალური მოძრაობის“ ორივე ლიდერმა დაადასტურა, რომ მათი მიზანი არის ხელისუფლების ძალადობრივი გზით შეცვლა და არა დემოკრატიული გზა, - ასე გამოეხმაურა პარლამენტის თავმჯდომარე, შალვა პაპუაშვილი „ერთიანი ნაციონალური მოძრაობის” თავმჯდომარის თინა ბოკუჩავას განცხადებას იმის თაობაზე, რომ „რევოლუციის თარიღი ხელოვნურად არ იკიდება და წინსწრებად არ ანონსდება“.

როგორც პაპუაშვილმა ჟურნალისტებს განუცხადა, დღემდე, ევროკავშირის ელჩი ჩუმად არის მაშინ, როდესაც მისი დაფინანსებული ადამიანები პარლამენტს წვავდნენ და პოლიციას თავს ესხმოდნენ.

„სინამდვილეში, საქმე დაპირისპირების არსში არ არის. შეიძლება თარიღების ტაქტიკა აქვთ სხვანაირი, მაგრამ „ნაციონალური მოძრაობის“ ორივე ლიდერმა დაადასტურა, რომ მათი მიზანი არის ხელისუფლების ძალადობრივი გზით შეცვლა - არა არჩევნები, არა დემოკრატიული გზა, არამედ ხელისუფლების ძალადობრივი გზით შეცვლა არის მათი მიზანი. ეს „ნაციონალური მოძრაობის“ ორივე ლიდერმა დაადასტურა. ამ პარტიას ხელს რომ ართმევს ზოგიერთი ელჩი, „ევროპის სახალხო პარტია“ მიხეილ სააკაშვილისთვის ცარიელ სკამს რომ გამოყოფს ხოლმე, ხომ აჩვენებს სინამდვილეში, რა უნდა ზოგიერთ უცხოელს ჩვენთვის? - უნდათ, რომ გაგვიმეორონ აქ 90-იანები ყველაფრით, შიდა და გარე დაპირისპირებით. რა თქმა უნდა, ამას არ დაუშვებს საქართველო. ზუსტად ეს იყო 26 ოქტომბერს ქართველი ხალხის პასუხი ყველა ქართველის და უცხოელის მიმართ, ვინც აქ ქუჩის ომის მოწყობას გვიპირებდა. ვნახეთ ამ ქუჩის ომის იმიტაციაც შარშან დეკემბერში, როდესაც ხელში მაშხალები დაიჭირეს, ტყვიამფრქვევით ესროდნენ პოლიციელებს და ერთი ევროპელი ელჩი ვერ მოვძებნეთ სანთლის შუქზე, რომ ერთს მაინც დაეგმო ეს ძალადობა პოლიციაზე, საქართველოს პარლამენტზე. დღემდე, ევროკავშირის ელჩი ჩუმად არის მაშინ, როდესაც მისი დაფინანსებული ადამიანები პარლამენტს წვავდნენ და პოლიციას თავს ესხმოდნენ“, - განაცხადა პაპუაშვილმა.