პოლონეთმა სამხრეთ კორეასთან K2 Black Panther-ის ტიპის 180 საბრძოლო ტანკის მიწოდების შესახებ მსხვილი კონტრაქტი გააფორმა.

Euronews-ის ცნობით, გარიგების დასრულების შემდეგ, 2030 წელს, ქვეყნის არმიას 1100-ზე მეტი ტანკი ეყოლება - მეტი, ვიდრე გაერთიანებული სამეფოს, გერმანიის, საფრანგეთისა და იტალიის ერთად აღებული.

კონტრაქტის ღირებულება 6 მილიარდ დოლარზე მეტია და მოიცავს არა მხოლოდ ტანკებს, არამედ 81 დამხმარე მანქანას, სასწავლო პროგრამებს, აღჭურვილობის შეკეთებისთვის საჭირო ინვენტარსა და ტექნოლოგიების გადაცემას. პოლონეთის ხელისუფლების განცხადებით, უკრაინის წინააღმდეგ რუსეთის აგრესიისა და ბელარუსის საზღვარზე დაძაბულობის ფონზე ეს ვარშავის მასშტაბური გადაიარაღების პროგრამის კიდევ ერთი ნაბიჯია.

„ეს ჩვენი სამშობლოს უსაფრთხოებისთვის, ჩვენი თავდაცვის ინდუსტრიისთვის მნიშვნელოვანი შეთანხმებაა. ეს პოლონეთში ტანკების წარმოების აღდგენის დასაწყისია“, - განაცხადა ვიცე-პრემიერმა და თავდაცვის მინისტრმა ვლადისლავ კოსინიაკ-კამიშმა.

ამჟამად პოლონეთი თავდაცვაზე მშპ-ს 4.7%-ს ხარჯავს - ეს ნატოს ყველა ქვეყანას შორის ყველაზე მაღალი პროცენტული წილია. კონტრაქტის დასრულების შემდეგ, ალიანსში ჯავშანტექნიკის რაოდენობით პოლონეთს მხოლოდ თურქეთი (2,238 ტანკი) და საბერძნეთი (1,344) გაუსწრებენ.