ლიეტუვაში ჩემი და ჩემი კოლეგების არასასურველ პირთა სიაში შემტანი მთავრობა კორუფციული სკანდალის გამო გადადგა - სწორედ ასეთები იღებენ უსამართლო გადაწყვეტილებებს, - ამის შესახებ სოციალურ ქსელში პარლამენტის ვიცე-სპიკერი ნინო წილოსანი წერს.

“საინტერესოა, ვინ იქნება შემდეგი?“ - წერს ნინო წილოსანი.

ცნობისთვის, ლიეტუვის პრემიერ-მინისტრმა გინტაუტას პალუცკასისმა დღეს ოფიციალურად განაცხადა გადადგომის შესახებ, რასაც მისი მთავრობის გადადგომა მოჰყვება.

პრემიერ-მინისტრის თანამდებობის გარდა, პალუცკასისი ასევე ტოვებს ლიეტუვის „სოციალ-დემოკრატიული პარტიის“ ლიდერის თანამდებობას, რომელიც ქვეყნის პარლამენტში ყველაზე დიდი პოლიტიკური ძალაა.

კანონის თანახმად, ქვეყნის პრეზიდენტს 15 დღე აქვს პარლამენტს პრემიერ-მინისტრის ახალი კანდიდატის წარსადგენად. მანამდე პალუკასისის კაბინეტი მოვალეობებს დროებით შეასრულებს.

„სოციალ-დემოკრატები“ ახალი პრემიერ-მინისტრის კანდიდატს ოთხშაბათს დაგეგმილ შეხვედრაზე განსაზღვრავენ.

31 ივლისს ლიეტუვის პრეზიდენტმა, გიტანას ნაუსედამ განაცხადა, რომ პალუცკასისმა გადადგომის შესახებ მიმართა.

როგორც ცნობილია, ლიეტუვაში პალუცკასისის გარშემო არაერთი სკანდალი აგორდა, როდესაც ჟურნალისტებმა მისი საეჭვო ბიზნესკავშირები გამოავლინეს. ამის საფუძველზე, ლიეტუვის გენერალურმა პროკურატურამ სპეციალურ საგამოძიებო სამსახურს მათი გარემოებების გამოძიება დაავალა. ნაუსედამ პალუცკასისს ბრალდებებზე ახსნა-განმარტებისთვის ორი კვირა მისცა.