„არ გაბედოთ!“ ამ ლოზუნგით „ბათუმელების“ დამფუძნებლის, მზია ამაღლობელისა და აქტივისტ, ნინო დათაშვილის მხარდასაჭერად „ფილარმონიიდან“ პარლამენტის მიმართულებით აქცია-მსვლელობა მიმდინარეობს.

„ფილარმონიასთან“ მზია ამაღლობელისა და ნინო დათაშვილის მხარდასაჭერი აქცია ქალებმა დააორგანიზეს. მათ გაშლილი აქვთ ბანერი წარწერით - „არ გაბედოთ! ვერ დააბრუნებთ საბჭოთა ტერორიზმს!“.

მსვლელობის მონაწილეები სკანდირებენ „თავისუფლება მზიას, თავისუფლება ნინო დათაშვილს, თავისუფლება სინდისის პატიმრებს!“.

როგორც ცნობილია, მოსამართლე, ნინო სახელაშვილი „ბათუმელებისა“ და „ნეტგაზეთის“ დამფუძნებლის მზია ამაღლობელის სისხლის სამართლის საქმეზე გადაწყვეტილებას 6 აგვისტოს, 14:00 საათზე გამოაცხადებს.

რაც შეეხება ნინო დათაშვილს, მისი უფლებადამცველის, თამარ გაბოძის განცხადებით, დათაშვილს, სასამართლოს განჩინების საფუძველზე, ფსიქიატრიული ექსპერტიზისთვის შესაბამის დაწესებულებაში სავარაუდოდ, 6 აგვისტოს გადაიყვანენ.