დონალდ ტრამპმა ჩინეთის წინააღმდეგ დაწესებული მაღალი ტარიფების ამოქმედება 90 დღით დააპაუზა, - ამის შესახებ ინფორმაციას CNBC-ი ავრცელებს.

CNBC-ის ცნობით, აშშ-ის პრეზიდენტმა, დონალდ ტრამპმა აღმასრულებელ ბრძანებას მოაწერა ხელი, რომლის მიხედვითაც ჩინეთთან მაისში მიღწეული 90-დღიანი სავაჭრო ზავის მოქმედება გაახანგრძლივა.

დონალდ ტრამპის აღმასრულებელი ბრძანების თანახმად, სავაჭრო ზავი 9 ნოემბრამდე იმოქმედებს.

შეგახსენებთ, მაისში ჟენევაში გამართულ შეხვედრაზე აშშ-ისა და ჩინეთის დელეგაციებმა 90-დღიან შეთანხმებას მიაღწიეს, რომლითაც ერთმანეთის წინააღმდეგ დაწესებული ტარიფები შეამცირეს.

სავაჭრო ზავის თანახმად, აშშ-მა ჩინეთიდან იმპორტირებულ საქონელზე დაწესებული ტარიფები 145%-დან 30%-მდე შეამცირა. ჩინეთმა კი აშშ-ის საქონელზე დაწესებული საპასუხო ტარიფები 125%-დან 10%-მდე შეამცირა.