ვოლოდიმირ ზელენსკისა და ვლადიმერ პუტინს შორის შეხვედრა ევროპაში უნდა გაიმართოს, შესაძლოა, შვეიცარიაში, - ამის შესახებ საფრანგეთის პრეზიდენტმა, ემანუელ მაკრონმა ფრანგულ მედიასთან ინტერვიუში განაცხადა.

„შეხვედრა ევროპაში უნდა ჩატარდეს. ეს მხოლოდ ჰიპოთეზა არ არის, ეს კოლექტიური ნებაა. შეხვედრა ნეიტრალურ ქვეყანაში უნდა მოხდეს. შესაძლოა, შვეიცარიაში. მე მხარს ჟენევას ვუჭერ. ან შეიძლება სხვა ქვეყანაში ჩატარდეს, ბოლოს ორმხრივი მოლაპარაკებები სტამბოლში იყო“, - განაცხადა ემანუელ მაკრონმა.

მისი თქმით, ვაშინგტონში, აშშ-ის პრეზიდენტთან, დონალდ ტრამპთან მოლაპარაკებებზე უკრაინისა და რუსეთის პრეზიდენტებს, ვოლოდიმირ ზელენსკისა და ვლადიმერ პუტინს შორის ორმხრივი შეხვედრის გამართვა გადაწყდა.

„გადავწყვიტეთ, რომ პრეზიდენტებს შორის ორმხრივი შეხვედრა გაიმართება, შემდეგ სამმხრივი შეხვედრა (დონალდ ტრამპის მონაწილეობით), შემდეგ კი მრავალმხრივი შეხვედრა, სადაც მოლაპარაკებების მაგიდასთან ევროპელებიც იქნებიან“, - აღნიშნა საფრანგეთის პრეზიდენტმა.

შეგახსენებთ, ევროპელ ლიდერებთან მოლაპარაკებების შემდეგ დონალდ ტრამპმა განაცხადა, რომ უკრაინის პრეზიდენტ ვოლოდიმირ ზელენსკისა და რუსეთის პრეზიდენტ ვლადიმერ პუტინს შორის შეხვედრის ორგანიზება დაიწყო.

გამოცემა Axios-ის ცნობით, დონალდ ტრამპს უკრაინისა და რუსეთის პრეზიდენტებს შორის შეხვედრის გამართვა მომდევნო ორი კვირის განმავლობაში სურს.