დარწმუნებული ვარ, რომ ასე არ იქნება, არ ვიცი, ეს არის ჩემი რწმენა, - ასე უპასუხა პრემიერ-მინისტრმა ირაკლი კობახიძემ მედიის კითხვას, შესაძლოა თუ არა გამოძიება ყოფილი პრემიერ-მინისტრით, ირაკლი ღარიბაშვილით დაინტერესდეს.

ამასთან, აღნიშნულ შეკითხვას, კობახიძემ სპეკულაციური უწოდა.

„სპეკულაციური, არასწორი და არაჯანსაღი კითხვები დავასრულოთ. დარწმუნებული ვარ, ასე არ იქნება, არ ვიცი, ეს არის ჩემი რწმენა.

[ირაკლი ღარიბაშვილთან კომუნიკაციაზე] კი, კი არაერთხელ მქონდა ბოლო პერიოდის განმავლობაში, მათ შორის მას შემდეგ, რაც მან დატოვა პარტიის თავმჯდომარის თანამდებობა. თუ არ ვცდები, ერთხელ თუ ორჯერ მქონდა კომუნიკაცია რაღაც თემებზე“, - განაცხადა ირაკლი კობახიძემ.

მან ასევე ისაუბრა იმაზე, რატომ არ იყო ღარიბაშვილი დედაქალაქის მერის კანდიდატად კახა კალაძის წარდგენის ღონისძიებაზე და რა სტატუსით მივიდა ამავე ღონისძიებაზე არჩილ თალაკვაძე.

„მან [ღარიბაშვილმა] თქვა, რომ პოლიტიკიდან გავიდა და რატომ უნდა მოსულიყო კალაძის წარდგენაზე?

[არჩილ თალაკვაძე] ის მოვიდა, როგორც საზოგადოების წარმომადგენელი, როგორც არა პოლიტიკოსი.

ადამიანი, ყოფილი პრემიერ-მინისტრი გავიდა პოლიტიკიდან და რა თქმა უნდა, მისი მხრიდან მოსვლას ცალკე სპეკულაციას მოაყოლებდით და არ გვინდა ეს სპეკულაციები“, - განაცხადა კობახიძემ.

ამასთან, ირაკლი კობახიძის თქმით, საკითხზე, შესაძლოა თუ არა, რომ ირაკლი ღარიბაშვილმა პარტია შექმნას, ვერაფერს იტყვის.

„არ ვიცი, მე ვერაფერს გეტყვით პარტიებთან დაკავშირებით. ჩვენ გვაქვს ჩვენი პარტია, ამოცანა იცით, რაც არის - 64/64-ზე. სიმართლე გითხრათ, არ მგონია [რომ ღარიბაშვილმა შესაძლოა პარტია შექმნას], მაგრამ მე, როგორ გითხრათ, სხვის მაგივრად, ვინ, რა შეიძლება დააპიროს. არ მგონია. კიდევ ერთხელ გეტყვით, რაც არის ჩვენი მიზანი - 64/64, პირველი ტური თბილისში და მინიმუმ, 38 დეპუტატი თბილისის საკრებულოში“, - განაცხადა ირაკლი კობახიძემ.