უკრაინის საგარეო საქმეთა სამინისტრომ რუსეთ-საქართველოს საზღვარზე არსებული ბუფერული ზონიდან 65 მოქალაქის უკრაინაში დაბრუნება ორგანიზება გაუწია, - ამის შესახებ უკრაინის საგარეო საქმეთა მინისტრმა, ანდრეი სიბიგამ განაცხადა.

მისი თქმით, დაბრუნებულ უკრაინელებს შორის 10 ქალი და რვა მძიმედ დაავადებულია და ყველა მათგანი რუსეთის ქმედებებით შექმნილი ჰუმანიტარული კრიზისის პირობებში საქართველოს საკონტროლო-გამშვებ პუნქტ „დარიალში“ იმყოფებოდა.

„უკრაინელმა დიპლომატებმა და კონსულებმა ყველა ღონე იხმარეს მოქალაქეების დასაბრუნებლად და საზღვარზე მათი ყოფნის პირობების გასაუმჯობესებლად, კერძოდ, საერთაშორისო ორგანიზაციების ჩართულობით“, - აღნიშნა უკრაინის საგარეო უწყების ხელმძღვანელმა.

მისი თქმით, 21-22 აგვისტოს, ერთობლივი ძალისხმევით, შესაძლებელი გახდა საქართველოდან მოლდოვას ტერიტორიის გავლით უკრაინელების კიდევ ერთი დიდი ჯგუფის წარმატებით დაბრუნება.

უკრაინის საგარეო უწყების ხელმძღვანელის თქმით, წინა თვეებში უკრაინის საგარეო საქმეთა სამინისტრომ ორგანიზება გაუწია 44 მოქალაქის დაბრუნებას. ამრიგად, „დარიალის“ საკონტროლო-გამშვები პუნქტიდან დაბრუნებულ უკრაინელთა საერთო რაოდენობამ 109-ს მიაღწია.

უკრაინული მედია წერს, რომ საგარეო საქმეთა სამინისტრო, საქართველოსა და მოლდოვაში უკრაინის საელჩოებთან, ჩართულ უკრაინულ უწყებებთან, ქართულ და მოლდოვურ მხარეებთან თანამშრომლობით, აგრძელებს მუშაობას იმ დარჩენილი მოქალაქეების დაბრუნების მიზნით, რომლებიც უკრაინაში რეპატრიაციის სურვილს გამოთქვამენ.