ყველა მომავალი აქცია უნდა იყოს კიდევ უფრო ფართო, მრავალრიცხოვანი, მასშტაბური, ხმამაღალი და აქტიური იმისთვის, რომ ცვლილებები რაც შეიძლება სწრაფად მოვიდეს და დემოკრატიული მომავლის პერსპექტივა არ დავკარგოთ, - ამის შესახებ “ევროპული საქართველოს“ თავმჯდომარემ გიგი წერეთელმა 8 ოპოზიციური პარტიის მიერ 13 სექტემბერს დაგეგმილ აქცია-მსვლელობასთან დაკავშირებით განაცხადა.

წერეთლის შეფასებით, “ქართულ ოცნებას“ ხელისუფლების ნებისმიერი მეთოდით შენარჩუნება სურს ისე, რომ არად დაგიდევს საქართველოს მომავალი ათწლეულები რუსეთთან ერთად იქნება თუ ევროპასთან“.

მისივე თქმით, საჭიროა საზოგადოების პროტესტი და სინერგია პარტიებსა და საზოგადოებას შორის.

“ყოველდღიურად ვხედავთ, თუ როგორ სუსტდება ჩვენი სახელმწიფოებრიობა, როგორ ვშორდებით დასავლეთს. საქართველო ძალიან ბევრ შესაძლებლობას მხარს ვერ უბამს. ძალიან ბევრ პერსპექტივას ვკარგავთ მათ შორის იმის გათვალისწინებით, რაც ჩვენს რეგიონში ხდება. ასევე ხდება მთელი კონსოლიდაცია უკრაინის ირგვლივ.

იმ პოლიტიკით, რაც დე ფაქტო ხელისუფლებას გააჩნია, ჩვენი ქვეყნის ევროპული ინტეგრაცია შორეულ პერსპექტივაში რჩება“, - განაცხადა გიგი წერეთელმა.

13 სექტემბერს, 8 ოპოზიციური პარტია, 19:00 საათზე ფილარმონიასთან შეკრებას და პარლამენტისკენ მსვლელობის გამართვას გეგმავს.