გუნდი, რომელსაც დღეს წარმოგიდგენთ, მზად არის აიღოს პასუხისმგებლობა თბილისისა და სხვა ქალაქების დაბრუნებაზე. სულ მალე კი მთელი ქართული სახელმწიფოს დაბრუნებაზე, - ამის შესახებ "გახარია საქართველოსა" და "ძლიერი საქართველოს" თბილისის საკრებულოს თავმჯდომარეობის კანდიდატმა გიორგი შარაშიძემ თბილისში საკრებულოს მაჟორიტარობის კანდიდატების წარდგენისას განაცხადა.

გიორგი შარაშიძის თქმით, „დღეს ჩვენს ქვეყანას ისე, როგორც არასდროს, სჭირდება ცვლილებები და ცვლილებები დღეს თბილისიდან იწყება“.

„აქ და ახლა საფუძველი ეყრება ნამდვილი, თანამედროვე, ევროპული ტიპის მმართველობას, როდესაც ორი კონკურენტი პოლიტიკური ძალა თანხმდება ერთობლივ მოქმედებაზე ბრძოლის გეგმაზე „ქართული ოცნების“ და ბიძინა ივანიშვილის ანტისახელმწიფოებრივი, ანტიეროვნული, ანტიევროპული, მოძალადე, კორუფციაში ჩაფლული რეჟიმის წინააღმდეგ.

ჩემო ძვირფასო თბილისელებო, არჩევანი დღეს ძალიან მკაფიო და ნათელია. ერთ მხარეს არის კორუფციაში ჩაფლული, ანტიდემოკრატიული, ანტისახელმწიფოებრივი მოძალადე რეჟიმი, ვისთვისაც მთავარი მოტივაცია ამ ქვეყნის განვითარება და მოსახლეობის კეთილდღეობა არ არის, ერთადერთი მოტივაციაა დარჩენილი, როგორმე ყველაფრის ფასად შეინარჩუნონ მოპარული ფული, კიდევ უფრო მეტი მოიპარონ და რაც შეიძლება დიდი ხნით შეინარჩუნონ ქართველი ხალხისგან მოპარული ძალაუფლება. რაც ყველაზე სამწუხაროა, ამ ყველაფერში ისინი ყველაზე ღირებულს, რაც გაგვაჩნია, საკუთარ სამშობლოს ცვლიან. მეორე მხარეს არის ჩვენი ორი პოლიტიკური ძალის: კოალიცია „ლელო-ძლიერი საქართველოს“ და „გახარია საქართველოსთვის“ სრულიად ახალი, სუფთა წარსულის მქონე, კეთილსინდისიერი, ღირსეული პროფესიონალებით დაკომპლექტებული გუნდი, რომელსაც დღეს წარმოგიდგენთ, რომელიც მზად არის აიღოს პასუხისმგებლობა თბილისისა და სხვა ქალაქების დაბრუნებაზე. სულ მალე კი მთელი ქართული სახელმწიფოს დაბრუნებაზე“, - განაცხადა გიორგი შარაშიძემ.