უკრაინის პრეზიდენტის, ვოლოდიმირ ზელენსკის განცხადებით, აშშ-ის პრეზიდენტმა, დონალდ ტრამპმა ორი კვირის წინ რუსეთს ორი კვირა მისცა რეალური მოლაპარაკებებისთვის მზადყოფნის გამოსახატავად.

„ორი კვირის წინ ვაშინგტონში განაცხადეს, რომ ამ დროისთვის რუსები მზად უნდა იყვნენ რეალური მოლაპარაკებებისთვის, ლიდერების დონეზე შეხვედრისთვის. უკრაინა, უდავოდ, ამისთვის მზადაა. მაგრამ ერთადერთი, რასაც რუსეთი აკეთებს, არის ომის გაგრძელება. მათგან ყველა სიგნალი ამაზე მიანიშნებს“, - აღნიშნა ზელენსკიმ.

მისი თქმით, რუსეთის ლიდერი ვლადიმერ პუტინი, რომელიც ოთხი დღით ჩინეთში იმყოფება შანხაის თანამშრომლობის ორგანიზაციის სამიტში მონაწილეობის მისაღებად, „ისევ თავს დაიძვრენს - ეს მისი ნომერ პირველი სპორტია“.

„მსოფლიოში ყველა ამბობდა, რომ ცეცხლის შეწყვეტა აუცილებელი იყო, ყველა ამტკიცებდა, რომ ომი უნდა დასრულებულიყო. ეს იყო ყველას პოზიცია - ჩინეთის, ჩვენ ამაზე ვისაუბრეთ ინდოეთის პრემიერ-მინისტრთან, ასევე სხვა ლიდერებთან, რომლებიც ახლა სამიტზე არიან - თურქეთი, აზერბაიჯანი, ყაზახეთი, მსოფლიოს თითქმის ყველა დანარჩენი ქვეყანაც მხარს უჭერს ომის დასრულებას. ერთადერთი, ვისაც ომი სურს, რუსეთია. ველით, რომ არავინ აიტანს ომის გაჭიანურებას, ველით მტკიცე პოზიციას აშშ-სგან, ევროპისგან, „დიდი ოცეულის“ ქვეყნებისგან“, - აღნიშნა ზელენსკიმ.