„ნაციონალური მოძრაობის“ გენერალური მდივნის მოადგილე, ირაკლი ფავლენიშვილი ხელისუფლებას თორნიკე რიჟვაძის საქმესთან დაკავშირებით პასუხისმგებლობას აკისრებს და აცხადებს, რომ ხელისუფლებამ 60 დღის განმავლობაში ვერ წარმოადგინა ვერცერთი მტკიცებულება.

ფავლენიშვილის თქმით, ხელისუფლების მიერ ხაზგასმული მთავარი არგუმენტი, ვიდეოჩანაწერი, სადაც მისი თქმით, თითქოს რიჟვაძე იარაღს იღებს და გადაადგილდება, საერთოდ არ არსებობს.

ფავლენიშვილი მიიჩნევს, რომ ასეთი მაღალი საჯარო ინტერესის საქმეებზე მტკიცებულებები სწრაფად უნდა ხდებოდეს საჯარო და ხელისუფლების მხრიდან ამ პროცესის გაჭიანურება მიუთითებს „რეჟიმის პრობლემურობაზე“.

„60 დღეზე მეტია „ერთიან ნაციონალურ მოძრაობას“ აქვს კონკრეტული მოთხოვნები და პრეტენზიები თორნიკე რიჟვაძის გახმაურებულ საქმესთან დაკავშირებით, თუმცა დღეს, რა თქმა უნდა, განსაკუთრებით მოხდა იმის დამტკიცება, რომ ჩვენი მოთხოვნები და პრეტენზიები აბსოლუტურად ლოგიკურია, რადგან მთავარი არგუმენტი, რაც ჰქონდათ „ქოცებს”, ეს ვერსია დღეს ფაქტობრივად გაცამტვერდა. ისინი ამბობდნენ, რომ ამ აბსოლუტური მონაჩმახისთვის უნდა დაგვეჯერებინა და პირველ რიგში შეურაცხყოფას აყენებენ თავიანთ ამომრჩეველს. ამის დამამტკიცებელი იყო ვიდეო მტკიცებულება, რომლის გამოქვეყნება არ მოხდა 60 დღის მანძილზე. გამოჩნდა, რომ ვიდეო მტკიცებულება საერთოდ არ არსებობს. ეს ხალხი იძახდა, ჩანს როგორ იღებს რიჟვაძე იარაღს, როგორ გადაადგილდება და დღეს თვითონ აღიარეს, რომ ასეთი ვიდეო მტკიცებულება ბუნებაში არ არსებობს, თითქოს არ ჩანს და მკაფიო ვერ არის.

ასეთი მაღალი საჯარო ინტერესის საქმეებზე ძალიან მალე ხდება ხოლმე როგორც ვიდეო მტკიცებულების გამომზეურება, ისევე როგორც ექსპერტიზის დასკვნის დადება. ამასაც რამდენი ხანია ვითხოვთ და ესეც ვერ მოხერხდა, არადა 5-6 დღეში, იმავე კვირაში ხდებოდა ამის გაკეთება. და მესამე, ახვლედიანი, რომელიც ამ საქმის მთავარი ფიგურანტი გახლავთ, რომლის იარაღითაც მოხდა გასროლა, რომლის სახლშიც მოხდა გასროლა, სადაც ვიდეომტკიცებულებებიც თითქოს არსებობს, არა თუ დაკავებული არ არის, საერთოდ სასამართლო სხდომებზეც კი არ ცხადდება, ანუ ფაქტობრივად კანონი აღარ კანონობს. ღიად, პირდაპირ ვხედავთ ჩვენ ამ ყველაფერს და მეოთხე, ასევე ძალიან მნიშვნელოვანი, შს მინისტრი გელაძე, რომელიც არსებობს ვარაუდები, რომ იმყოფებოდა ადგილზე, ეს ადამიანი მიუხედავად არალეგიტიმური ხელისუფლებისა, არ უნდა იკავებდეს თანამდებობას. ამიტომაც, ჩვენ კვლავინდებურად გვრჩება ეს მოთხოვნები, ადამიანები ერთმანეთს მოსაკლავად იმეტებენ და ამ ყველაფერს არ იძიებენ. სადაც ივანიშვილის ახლო გარემოცვის ერთ-ერთი წევრის საქმეს არ იძიებენ, წარმოიდგინეთ როგორი დაუცველია საქართველოს თითოეული მოქალაქე, ამიტომაც აუცილებელია ამ რეჟიმის დემონტაჟი და 4 ოქტომბერს ყველას მოგიწოდებთ, რომ ერთად დავასრულოთ ეს რეჟიმი და გამოვიძიოთ ეს მნიშვნელოვანი და მაღალი საჯარო ინტერესის მქონე საქმე“, - განაცხადა ირაკლი ფავლენიშვილმა.