თბილისის მერობის კანდიდატი ირაკლი კუპრაძე, ვიცე მერობის კანდიდატები ალეკო ელისაშვილი და ტატა ხვედელიანი თაბუკაშვილის 25 ნომერში მდებარე ავარიული სახლის მცხოვრებლებს შეხვდნენ. ამის შესახებ ინფორმაციას „ლელო ძლიერი საქართველოს“ პრესსამსახური ავრცელებს.

“ლელო ძლიერი საქართველოს” ლიდერები მოსახლეობას დაჰპირდნენ, რომ არჩევნებში გამარჯვების შემთხვევაში, ამ პრობლემას მათ სასარგებლოდ და მათთან შეთანხმებით გადაწყვეტენ.

„მე-4 კატეგორიის ავარიულ შენობას, კულტურული მემკვიდრეობის სტატუსი აქვს. 9 ოჯახიდან, რომლის საკუთრებაშიც თბილისური ეზოა, ოთხი ოჯახი მე 15 წელია, ქირით არის გაყვანილი, 5 ოჯახი კი სახლის დატოვებაზე და მერიის მიერ შეთავაზებულ 500 ლარიან კომპენსაციაზე უარს ამბობს.

შენობის დანგრევა არ შეიძლება იმიტომ რომ კულტურული მემკვიდრეობის ძეგლია - გამაგრება კი შეუძლებელია, რადგან მე-4 კატეგორიის დაზიანებაა.

თბილისის მერი კალაძე ამბობს, რომ ისტორიულ ზონაში გათავისუფლებული არეალები მომზადდება საინვესტიციო მიზნებისთვის ისე, რომ ქალაქის ისტორიული იდენტობა შენარჩუნდეს, მაგრამ პარალელურად გაჩნდეს განვითარების ახალი შესაძლებლობები. ადგილობრივები შიშობენ, რომ კალაძე ისტორიული შენობების მესაკუთრეებს დაზიანებული შენობების რეაბილიტაციის ნაცვლად, საკუთრების მიყიდვას აიძულებს, შემდეგ კი საინვესტიციო მიზნებისთვის გამოიყენებს.

ეს კი მესაკუთრეებს წაართმევს შესაძლებლობას, თავად განკარგონ საკუთარი ქონება, რაც მათთვის დამატებითი შემოსავლის წყარო შეიძლება გახდეს.

მერია მათ არჩევანს არ უტოვებს. ან იცხოვრებენ ავარიულ სახლში, ან გაყიდიან, რის შემდეგაც მას მერია განკარგავს”, - ნათქვამია ინფორმაციაში.