აშშ-მა ბელარუსული ავიაკომპანია Belavia-ს წინააღმდეგ დაწესებული სანქციები მოხსნა
ალექსანდრე ლუკაშენკო აშშ-ის პრეზიდენტის წარმომადგენელს შეხვდა, - ინფორმაციას ბელარუსის სახელმწიფო საინფორმაციო სააგენტო „ბელტა“ ავრცელებს.
აშშ-ის პრეზიდენტის, დონალდ ტრამპის წარმომადგენლის, ჯონ კოულის განცხადებით, აშშ-მა ავიაკომპანია Belavia-ს წინააღმდეგ დაწესებული სანქციები მოხსნა.
„ჩვენ მოუთმენლად ველით ბელარუსის რესპუბლიკასა და აშშ-ს შორის ორმხრივი ურთიერთობების ნორმალიზებას და მზად ვართ ამისთვის ყველაფერი გავაკეთოთ. მსურს, აქ განვაცხადო, რომ ჩვენ Belavia-ს წინააღმდეგ დაწესებული სანქციები მოვხსენით. ეს ოფიციალურია“, - განაცხადა ჯონ კოულმა.
შეხვედრაზე კოულმა ლუკაშენკოს დონალდ ტრამპისგან წერილი გადასცა.
ალექსანდრე ლუკაშენკომ აღნიშნა, რომ ბელარუსს აშშ-თან ეკონომიკური თვალსაზრისით ურთიერთობის დიდი ინტერესი აქვს.
„ვფიქრობ, თქვენ ეკონომიკური სფეროს თვალსაზრისით ინტერესები ბელარუსში გაქვთ და ბელარუსის მეშვეობით რუსეთში. ბუნებრივია, რომ ეკონომიკის მხრივ თქვენს გლობალურ სახელმწიფოსთან დიდი ინტერესი გვაქვს“, - აღნიშნა ლუკაშენკომ.
