გორის მუნიციპალიტეტის საკრებულოს თავმჯდომარის იმპიჩმენტის საკითხი ჩავარდა. დავით რაზმაძის გადაყენებას საკრებულოს 36 წევრიდან მხოლოდ 10-მა დაუჭირა მხარი. კენჭისყრაში „ქართული ოცნების“ წევრები და დამოუკიდებელი დეპუტატები არ მონაწილეობდნენ.

„საარჩევნო ყუთში ბიულეტენების რაოდენობამ შეადგინა თერთმეტი, ბათილი საარჩევნო ბიულეტენების რაოდენობა იყო - ერთი, შესაბამისად, ნამდვილი ბიულეტენების რაოდენობა იყო ათი და კენჭისყრის შედეგები ამგვარია - მომხრე 10, მოწინააღმდეგე არცერთი, შესაბამისად, საკრებულოს თავმჯდომარის გადაყენების გადაწყვეტილება არ იქნა მიღებული და საკრებულოს რეგლამენტით, აღნიშნული საკითხი განსახილველად აღარ შეიძლება დაისვას სამი თვის განმავლობაში“, - განაცხადა საკრებულოს თავმჯდომარის მოადგილემ, სხდომის სპიკერმა მარლენ ნადირაძემ.

ინფორმაციისთვის, დავით რაზმაძის იმპიჩმენტის საკითხი დღის წესრიგში მას შემდეგ დადგა, რაც მისი ინტერვიუ „New York Times“-ში გამოქვეყნდა. კერძოდ, 20 აგვისტოს, The New York Times-მა გამოაქვეყნა სტატია სათაურით: “როგორ აღმოჩნდა საქართველო დემოკრატიის ავანგარდიდან ავტოკრატიის მოწინავე ხაზზე“. ჟურნალისტი გორის საკრებულოს თავმჯდომარეს დავით რაზმაძეს ესაუბრა, რომელმაც სტატიის მიხედვით, 2008 წლის რუსეთ-საქართველოს ომთან დაკავშირებით შემდეგი განცხადება გააკეთა: - “ისინი აქ, როგორც მშვიდობისმყოფელები შემოვიდნენ, და მადლობა ღმერთს რომ შემოვიდნენ, ვინაიდან მიშას [სააკაშვილი] ხულიგნები მთელ ქალაქს ძარცვავდნენ. მათ მღვდლის მანქანაც კი მოიპარეს, თუ დაიჯერებთ. რუსები რომ არ შემოსულიყვნენ, ვინ იცის, ისინი კიდევ რამხელა ზიანს გამოიწვევდნენ“.