სამხედრო წვრთნების ბელარუსის ტერიტორიაზე ჩატარებით არავის ვემუქრებით, - ამის შესახებ ბელარუსის პრეზიდენტმა, ალექსანდრე ლუკაშენკომ განაცხადა.

„დღეს, ბელარუსის ტერიტორიაზე დაგეგმილი წვრთნები მიმდინარეობს. წვრთნების ფარგლებში ყველაფრის გამოყენებაზე ვვარჯიშობთ. ამას არ ვმალავთ და ეს დასავლეთშიც იციან. მცირე ზომის იარაღიდან გასროლით დაწყებული, ბირთვული ქობინების გაშვებით დამთავრებული. ჩვენ ამ ყველაფრის გაკეთება უნდა შევძლოთ, წინააღმდეგ შემთხვევაში მათ ბელარუსის ტერიტორიაზე განლაგებას რა აზრი აქვს“, - განაცხადა ლუკაშენკომ.

ამასთან, ბელარუსის შეიარაღებული ძალების გენერალური შტაბის უფროსის, პაველ მურავეიკოს ცნობით, სამხედრო წვრთნების ფარგლებში ბელარუსმა და რუსმა სამხედროებმა „ორეშნიკის“ ბალისტიკური რაკეტების გამოყენების სავარჯიშოებიც შეასრულეს.

შეგახსენებთ, რუსეთ-ბელარუსის ერთობლივი წვრთნები - „ზაპად 2025“ - 12 სექტემბერს დაიწყო და დღეს, 16 სექტემბერს სრულდება.