გაერთიანებული სამეფოს პრემიერ-მინისტრი, კირ სტარმერი შაბათ-კვირას, მას შემდეგ, რაც აშშ-ის პრეზიდენტი, დონალდ ტრამპი გაერთიანებულ სამეფოში სახელმწიფო ვიზიტს დაასრულებს, პალესტინის სახელმწიფოს აღიარებს, - ინფორმაციას The Guardian-ი ავრცელებს.

პრემიერ-მინისტრმა ადრე განაცხადა, რომ პალესტინის სახელმწიფოს გაერო-ს გენერალური ასამბლეის დაწყებამდე აღიარებს, თუ ისრაელი ღაზაში ჰუმანიტარული სიტუაციის გასაუმჯობესებლად საჭირო პირობებს არ შეასრულებს.

გაერო-ს სამიტზე მსოფლიო ლიდერების მონაწილეობით მაღალი დონის შეხვედრები 23 სექტემბერს დაიწყება. Times-ის ცნობით, სტარმერმა ოფიციალური განცხადების გაკეთება იმის შესახებ, რომ გაერთიანებული სამეფო პალესტინის სახელმწიფოს აღიარებს, ტრამპის წასვლამდე გადადო, რადგან შიშობს, რომ ეს საკითხი, შესაძლოა, ხუთშაბათს დაგეგმილ პრესკონფერენციაზე დომინირებდეს.