მთავრობის მიერ დაგეგმილი ბიუჯეტის შემცირების გამო საფრანგეთში პროფკავშირები გაიფიცნენ, - ინფორმაციას The Guardian-ი ავრცელებს.

გამოცემის ცნობით, დღეს დილიდან საფრანგეთში მასწავლებლები, მძღოლები, ფარმაცევტები და ექიმები გაიფიცნენ, ხოლო მოსწავლეებმა სკოლების შესასვლელები გადაკეტეს.

მასშტაბური გაფიცვის გამო, პარიზში მეტრო დღის განმავლობაში მუშაობას შეაჩერებს.

ადგილობრივი მედიის ინფორმაციით, ქვეყნის მასშტაბით დილიდან პოლიციამ უკვე 50-ზე მეტი ადამიანი დააკავა.

პროფკავშირები ქვეყნის პრემიერ-მინისტრის, სებასტიან ლეკორნუს მიერ დაგეგმილ ბიუჯეტის შემცირებას ეწინააღმდეგებიან და საჯარო სერვისებისთვის დაფინანსების გაზრდას, მდიდრებზე მაღალი გადასახადების დაწესებასა და სახელმწიფო საპენსიო სისტემის არაპოპულარული ცვლილებების გაუქმებას ითხოვენ.

საფრანგეთის შინაგან საქმეთა სამინისტროს განცხადებით, მოსალოდნელია, რომ დღეს დაგეგმილ საპროტესტო აქციებში მონაწილეობას 800 000-მდე ადამიანი მიიღებს.