დანიის პრემიერ-მინისტრის, მეტე ფრედერიქსენის განცხადებით, დრონების გამოჩენის გამო კოპენჰაგენის აეროპორტში მომხდარი შეფერხება დანიის კრიტიკულ ინფრასტრუქტურაზე დღემდე განხორციელებული ყველაზე სერიოზული თავდასხმა იყო.

„ეს რაღაცას ამბობს იმ დროზე, რომელშიც ვცხოვრობთ და რისთვისაც ჩვენ, როგორც საზოგადოება, მზად უნდა ვიყოთ“, - აღნიშნა პრემიერმა და დასძინა, რომ ხელისუფლება „არ გამორიცხავს არანაირ ვარიანტს იმასთან დაკავშირებით, თუ ვინ დგას ამის უკან“.

„ნათელია, რომ ეს ემთხვევა იმ მოვლენებს, რომლებიც ბოლო დროს ვნახეთ სხვა დრონებით თავდასხმებთან, საჰაერო სივრცის დარღვევებთან და ევროპის აეროპორტებზე ჰაკერულ თავდასხმებთან დაკავშირებით“, - აღნიშნა დანიის პრემიერმა.

შეგახსენებთ, კოპენჰაგენისა და ოსლოს აეროპორტები რამდენიმე საათით დაიხურა მას შემდეგ, რაც ორშაბათს გვიან ღამით მათ საჰაერო სივრცეში დრონები შენიშნეს, რის შედეგადაც ათიათასობით მგზავრი გზაში დაზარალდა, რადგან ავიარეისები გადამისამართდა, დაგვიანდა, ან გაუქმდა.